निर्माणाधीन इमारतीच्या 13व्या मजल्यावरून पडून एक मजूर गंभीर जखमी झाल्याची घटना बदलापुरात शनिवारी घडली. मोहन विलोज या निर्माणाधीन इमारतीत ही घटना घडली. प्रमोद रामलाल खडीया असे मयत मजुराचे नाव आहे. प्रमोद मूळचा छत्तीसगडचा असून तो पत्नीसह या इमारतीत काम करत होता. या प्रकरणी बदलापूर पोलीस पुढील तपास करत आहेत.
बदलापुरातील सुरवळ चौकातील इमारतीत शनिवारी दुपारच्या सुमारास काम करत असताना प्रमोद 13 व्या मजल्यावरून खाली कोसळला. यात तो गंभीर जखमी झाला असून त्याला तात्काळ बदलापूर ग्रामीण रुग्णालयात नेण्यात आले. त्याची प्रकृती गंभीर असल्याने त्याला केईएम रुग्णालयात हलवण्यात आले आहे. इमारतीच्या ठिकाणी संरक्षक जाळ्या न लावल्यामुळे हा अपघात झाल्याचे बोलले जात आहे.
