महाकुंभमेळ्याचा विमान प्रवास महागलाय. प्रयागराजला जाणाऱ्या विमानाचे भाडे 50 हजार रुपयांपर्यंत वाढले आहे. महाकुंभमेळ्याची जगभरात चर्चा आहे. गंगा, यमुना, सरस्वती नदीच्या पवित्र संगमात स्नानाचे अनोखे महत्त्व आहे. 45 दिवसांत संगमात स्नान करण्यासाठी मोठय़ा प्रमाणात भाविक येतात. ही संख्या 40 कोटींपर्यंत जाण्याची शक्यता आहे. प्रयागराज येथे पोहोचण्यासाठी रस्ते, रेल्वे, विमान मार्ग फुलून गेले आहेत. विमानाचे दर गगनाला भिडले असून त्यात आणखी वाढ होण्याची शक्यता आहे.
या सर्व परिस्थितीच्या पार्श्वभूमीवर डीजीसीएने विमान कंपन्यांना तिकिटासाठी योग्य दर आकारण्याचा आणि विमान फेऱ्या वाढवण्याच्या सूचना दिल्या आहेत. नागरी उड्डाण महासंचालनालयाने जानेवारी महिन्यासाठी 81 अतिरिक्त विमानांना मंजुरी दिली आहे. त्यामुळे देशभरातून प्रयागराजसाठी एकूण 132 उड्डाणांपर्यंतची कनेक्टिविटी वाढली आहे. महाकुंभमेळ्यात पवित्र स्नानाच्या दिवशी फ्लाईट तिकिट सर्वाधिक दराने विकली जात आहे. महाकुंभमेळ्यात 29 जानेवारी, 3 फेब्रुवारी, 12 फेब्रुवारी यासारख्या दिवशी दिल्ली, मुंबईहून प्रयागराजला येणाऱ्या विमानाचे तिकीट दर गगनाला भिडलेत.
