बुधवारपासून मुंबईत 20 टक्के पाणीकपात, तलावांत 35 टक्केच पाणी

521

मुंबईत बुधवार, 5 ऑगस्टपासून 20 टक्के पाणीकपात करण्यात येणार आहे. पालिका आयुक्त इकबाल सिंह चहल यांनी ही माहिती दिली. मुंबईला पाणीपुरवठा करणार्‍या सात तलावांत मिळून सध्या 499199 दशलक्ष लिटर म्हणजेच 35 टक्के पाणीसाठा जमा आहे. गेल्या वर्षीच्या तुलनेत हे पाणी तब्बल 51 टक्क्यांनी कमी आहे. त्यामुळे वर्षभराचे नियोजन करता यावे यासाठी हा निर्णय घेण्यात आला आहे.

मुंबईला मोडकसागर, तानसा, अप्पर वैतरणा, मध्य वैतरणा, तुळशी, विहार व भातसा अशा सात धरणांमधून दररोज 3800 दशलक्ष लिटर पाणीपुरवठा केला जातो. मुंबईकरांना वर्षभर पुरेसे पाणी मिळण्यासाठी 1 ऑक्टोबर रोजी सातही धरणांत मिळून 14 लाख 47 हजार 363 दशलक्ष लिटर पाणी असणे आवश्यक असते. यावेळी उपलब्ध पाणीसाठ्याचा आढावा घेऊन पाणीपुरवठ्याचे नियोजन केले जाते. मात्र यावर्षी जून-जुलैमध्ये तलाव क्षेत्रात कमी पाऊस झाल्याने खबरदारी म्हणून नियोजन करण्यासाठी पाणीकपात लागू करण्यात येत असल्याचे पालिकेकडून सांगण्यात आले.

यावर्षी अजून पावसाचे दोन महिने शिल्लक असल्याने समाधानकारक पाऊस होऊन  लवकरच ही पाणीकपात मागेही घेतली जाईल, असा विश्वास वाटतो.-  किशोरी पेडणेकर, महापौर

तीन वर्षांची स्थिती

वर्ष               जलसाठा         टक्केवारी

2020               499199           34.49

2019               1240122        85.68

2018               1205596        83.30

31 जुलै रोजीचा पाणीसाठा

(दशलक्ष लिटरमध्ये)

तलाव               पाणीसाठा         टक्केवारी

अप्पर वैतरणा             39375             17.34

मोडक सागर      51866             40.23

तानसा               37283             25.70

मध्य वैतरणा      66252             34.23

भातसा              277351           38.68

विहार               19026             68.69

तुळशी               8046               100

एकूण                499199           35 टक्के

आपली प्रतिक्रिया द्या