ग्रामीण भागातील एसटीची सेवा पूर्वपदावर येणार, सातारा विभाग करणार 50 कंत्राटी चालकांची भरती

बातमी शेअर करा :
सामना फॉलो करा

राज्य परिवहन महामंडळाच्या कर्मचाऱयांच्या संपामुळे ग्रामीण भागातील एसटी फेऱया कमी असल्याने प्रवाशांना शहरात येताना अडचणींचा सामना करावा लागत आहे. या पार्श्वभूमीवर सातारा विभागीय कार्यालयाच्या वतीने 50 कंत्राटी चालकांची भरती करण्यात येणार असल्याची माहिती महामंडळ प्रशासनाने दिली आहे.

महामंडळाच्या राज्यभरातील कर्मचाऱयांनी विविध मागण्यांसाठी मागील तीन महिन्यांपासून संप पुकारला आहे. ऐन दिवाळीत संप सुरू झाल्याने अनेक चाकरमान्यांचे हाल झाले होते. कर्मचारी संघटना व परिवहनमंत्र्यांनी तीन बैठका घेऊन सुमारे 41 टक्के पगारवाढ केली. तरीदेखील कर्मचाऱयांनी विलीनीकरण या मुद्यावर ठाम राहात संप सुरूच ठेवला. त्यानंतर महामंडळ प्रशासनाने कामावर हजर न होणाऱया कर्मचाऱयांवर कारवाईचा बडगा उगारत त्यांचे निलंबन केले. या कारवाईमुळे आगारांतील 50 टक्क्यांहून अधिक कर्मचारी कामावर हजर झाले. त्यामुळे सलग दोन महिने बंद असलेली वाहतूक काहीअंशी पूर्वपदावर येऊ लागली आहे.

जिह्यातील आगारांतून अद्यापही पूर्ण क्षमतेने फेऱया सुरू नाहीत. त्यामुळे कंत्राटी चालकांची भरती केली जाणार आहे. याबाबत कंत्राटी कर्मचाऱयांच्या ठेकेदारांशी चर्चा झाली असून, लवकरच कर्मचारी देण्याची मागणी केली आहे. जेणेकरून जिह्यात फेऱयांची संख्या वाढून प्रवाशांची गैरसोय दूर केली जाणार आहे, असे वाहतूक अधिकारी ज्योती गायकवाड यांनी सांगितले.