कपडे धुणे आणि सुकवणे हे काही वेगळे नाही. हे दररोजचे काम आहे. आपण किंवा आपल्या घरातील आई हे काम दररोज करते. पण, तुम्हाला माहित आहे का? या छोट्या छोट्या गोष्टी देखील फार महत्त्वाच्या आहेत. आपण याकडे फारसे लक्ष देत नाही. परंतु, या देखील गोष्टी फार काळजीपूर्वक कराव्या लागतात. अनेकदा आपण कपडे धुताना किंवा ते वाळवण्याबाबत छोट्या छोट्या चुका करतो. आणि त्याचे भयंकर परिणाम आपल्याला सहन करावे लागतात.
संक्रमण झालेल्या व्यक्तीचे कपडे निरोगी व्यक्तीच्या कपड्यांसोबत धुणे
आपण अनेकदा ही चूक करतो. आपल्या घरात एखादी आजारी व्यक्ती असेल किंवा संक्रमण झालेली व्यक्ती असेल तर त्या व्यक्तीचे कपडे वेगळे धुणे फार गरजेचे आहे. पण, सहजासहजी आपण तसे करत नाही. आपण सर्वांचे कपडे एकत्र साबणाच भिजत घालतो. यामुळे निरोगी व्यक्तीच्या कपड्यांना आजारी व्यक्तीच्या कपड्यांवरील विषाणू पसरु शकतात आणि ती व्यक्ती देखील आजारी पडण्याची शक्यता नाकारता येत नाही. त्यामुळे आजारी व्यक्तीचे कपडे वेगळे धुवावे. त्या व्यक्तीचे कपडे निरोगी व्यक्तीच्या कपड्यांमध्ये एकत्र करु नये.
कपडे धुण्यासाठी अनेक दिवस कपड्यांचा ढीग रचून ठेवणे
अनेकदा आपण कपडे धुण्याचा कंटाळा करतो. त्यामुळे सर्व कपडे आपण आपली एखादी सुट्टी असेल त्यादिवशी धुण्याकरता काढतो. पण, असे करु नये. कपडे दररोज धुणे फार गरजेचे आहे. कारण आपण जे कपडे एकत्र ठेवतो त्यात अंतर्वस्त्रे देखील असतात. ज्यामुळे यीस्टसारखे जननेंद्रियाचे संक्रमण पसरण्याचा धोका असतो. तसेच लहान मुलांचा धोका इतर लोकांपेक्षा अधिक असतो कारण मुलं धुण्याच्या कपड्यांना हात लावून सर्वत्र जंतू पसरु शकतात.
अधिक प्रमाणात डिटर्जंट वापरणे
कपड्यांमध्ये जास्त प्रमाणात डिटर्जंट वापरल्याने त्वचेची अॅलर्जी होण्याची शक्यता नाकारता येत नाही. तसेच त्वचा कोरडी होणे आणि खाज सुटणे अशा एक ना अनेक समस्यांना सामोरे जावे लागते.
घरात कपडे वाळवणे धोकादायक
अनेकदा आपण आपले कपडे घरातच वाळत घालतो. पण, घरात कपडे वाळवणे देखील चुकीचे आहे. कारण खोलीत ओलावा राहतो. कपडे घरामध्ये वाळवल्याने वातावरणातील आर्द्रता ३० टक्क्यांपर्यंत वाढते आणि या बुरशीचा डोळ्यांवर परिणाम होतो.
कपडे स्वच्छ धुणे आणि वाळवणे महत्त्वाचे का आहे?
कपडे स्वच्छ न धुतल्याने किंवा कोरडे न केल्याने कपड्यांमध्ये ओलावा आणि बॅक्टेरिया राहतात. यामुळे अनेक गंभीर आजार होऊ शकतात.
त्वचेची अॅलर्जी
कपडे स्वच्छ धुवून आणि सुकवून घातले नाही तर अॅलर्जी होण्याची शक्यता अधिक असते. कपडे नीट सुकले नाही तर कपड्यांमध्ये ओलावा राहतो आणि त्वचेची अॅलर्जी होऊ शकते.
बुरशीजन्य संसर्ग होऊ शकतो
हा एक संसर्ग आहे. कपडे व्यवस्थित सुकवले नाही तर त्या ओल्या कपड्यांमुळे संसर्ग होण्याची शक्यता अधिक असते. फंगल इन्फेक्शनच्या समस्या होऊ शकतात.
जिवाणू संसर्ग
उन्हाळ्यात अनेकदा फोडांची समस्या उद्भवते. ही समस्या केवळ उष्णतेमुळे नाही तर कपड्यांमुळेही होते. बॅक्टेरियाच्या संपर्कात आल्याने फोडी येतात. या समस्या गुप्तांगांच्या भागात होतात. जिवाणूंचा संसर्ग होण्याचे कारण म्हणजे कपडे व्यवस्थितरित्या न सुकवणे.
