विक्रोळीच्या संक्रमण शिबिरातील 11 गाळ्यांच्या वाटपाबाबत आरोप करत एका महिलेने गेल्या आठवड्यात म्हाडा भवनात नोटा उधळल्या होत्या. याची गंभीर दखल म्हाडाने घेतली आहे. 20 वर्षांपासून रखडलेल्या प्रकरणातील संबंधित 11 अर्जदारांना पात्रता निश्चितीसाठी म्हाडा उद्या, गुरुवारी सुनावणी घेणार आहे.
अर्जदारांनी आवश्यक कागदपत्रांसह सुनावणीस हजर राहण्याबाबत संबंधित अर्जदारांना समितीतर्फे नोटीस देण्यात आली आहे. संक्रमण शिबिरातील गाळेवाटपाच्या चौकशीसाठी म्हाडा उपाध्यक्षांनी इमारत दुरुस्ती मंडळाचे उपमुख्य अभियंता यांच्या अध्यक्षतेखाली त्रिसदस्यीय समिती गठित केली आहे. अर्जदारांनी सादर केलेल्या कागदपत्रांच्या अनुषंगाने पात्रता निश्चिती करून संक्रमण गाळे वाटपसंबंधीचा तपशीलवार अहवाल समिती सादर करणार आहे. 11 अर्जदारांची पात्रता निश्चित झाल्यानंतर संक्रमण गाळेवाटपासंबंधी निर्णय घेण्यात येणार आहे.
