केरळ, महाराष्ट्रासह अनेक राज्यांत कोरोना रुग्णांची संख्या वाढत असून आतापर्यंत कोरोना रुग्णांची संख्या 4 हजार 866 वर पोहोचली आहे. त्याचबरोबर सक्रिय रुग्णांच्या संख्येतही वाढ झाली आहे. दरम्यान, कोरोनाला घाबरू नका, खबरदारी घ्या, असे आवाहन पेंद्रीय आरोग्य विभागाने केले आहे.
देशात जानेवारीपासून कोरोना रुग्णांची संख्या वाढत असून केरळमध्ये सर्वाधिक रुग्ण सापडले आहेत. केरळमध्ये आतापर्यंत 1 हजार 487 कोरोना रुग्ण सापडले आहेत. केरळपाठोपाठ महाराष्ट्र, गुजरात आणि कर्नाटकमध्येही रुग्णसंख्येत वाढ होत आहे.
महाराष्ट्रात आज रुग्णसंख्या घटली
राज्यात बुधवारी एकाच दिवशी 105 कोरोना रुग्ण सापडले होते, तर आतापर्यंत 17 जणांचा मृत्यू झाला आहे. मात्र आज रुग्णसंख्येत घट झाली असून दिवसभरात 98 रुग्ण सापडले आहेत. सुदैवाने आज कोरोनामुळे कोणाचाही मृत्यू झाला नाही. आतापर्यंत राज्यात 14 हजार 565 चाचण्या झाल्या असून 1 हजार 162 रुग्ण सापडले आहेत. त्यापैकी सध्या 548 सक्रिय रुग्ण आहेत, तर 597 रुग्ण बरे झाले आहेत. एकटय़ा मुंबईत आतापर्यंत 575 कोरोना रुग्ण सापडले आहेत.
कोरोना आपल्याबरोबरच राहणार – आरोग्यमंत्री
कोरोना व्हायरसने देशभरात पुन्हा एकदा डोके वर काढले आहे. राज्यातही कोरोना रुग्णांची आकडेवारी वाढत आहे. कोरोना आपल्या सोबतच राहणार आहे. लोकांना पॅनिक होऊ देऊ नका. फक्त योग्य ती काळजी घ्या, अशा सूचना आरोग्यमंत्री प्रकाश आबिटकर यांनी प्रशासनाला केल्या आहेत.
