इंदूरमधील ट्रान्सपोर्ट व्यावसायिक राजा रघुवंशी यांची हत्या पत्नी सोनमनेच केल्याचे उघड झाले आहे. याप्रकरणी सोनमसह 5 संशयितांना अटक करण्यात आली आहे. रविवारी रात्री उशिरा सोनम उत्तर प्रदेशातील गाझीपूर येथील ढाब्यावर पोहोचली होती. ढाबा चालकानेच पोलिसांना याची माहिती दिल्याचे पोलिसांनी सांगितले.
पाच आरोपींना मध्य प्रदेश, उत्तर प्रदेशातील वेगवेगळ्या ठिकाणी रात्रीच्या वेळी टाकलेल्या छाप्यात अटक करण्यात आली. यात मध्य प्रदेशातील बिना येथील आनंद, राज कुशवाह, विशाल चौहान आणि इंदूर येथील आकाश राजपूत आणि उत्तर प्रदेशातील ललितपूरच्या आकाश लोधी यांचा समावेश आहे. शवविच्छेदन अहवालात राजा यांच्यावर धारदार शस्त्राने वार करण्यात आल्याचे समोर आले. त्यांच्या डोक्यावर दोन जखमा होत्या. मेघालयातील शिलाँग येथील सखी वन स्टॉप सेंटरमध्ये पोलिसांनी सोनमला ताब्यात घेतले. दरम्यान, आमची मुलगी निर्दोष आहे, असे तिच्या कुटुंबीयांचे म्हणणे आहे.
