एका कंपनीने आपल्याला झालेला उत्तम नफा लक्षात घेऊन आपल्या एक हजार कर्मचाऱयांना लंडनवारी घडवून आणण्याचा निर्णय घेतला. आपल्या कर्मचाऱयांचा इतका विचार करणाऱया या कंपनीचे चांगलेच कौतुक होत आहे. कॅसाग्रँड असे या कंपनीचे नाव आहे. चेन्नईतील ही रिअल इस्टेट कंपनी आहे. उत्कृष्ट कामगिरी करणाऱया कर्मचाऱ्यांसाठी कंपनीचा हा वार्षिक कर्मचारी बक्षीस उपक्रम ‘प्रॉफिट शेअर बोनान्झा’चा एक भाग आहे.
देशातील आणि दुबईतील कार्यालयांमधील कर्मचारी या सहलीत सहभागी होतील. 1,000 कर्मचाऱयांना टप्प्याटप्प्याने लंडनला पाठवले जाणार असल्याचे समजते. या दौऱयात विंडसर कॅसलचा ऑडिओ टूर, कॅम्डेन मार्केटमधील गजबजलेल्या परिसराची सफर आणि इंटरकॉन्टिनेंटल लंडनमध्ये एक शानदार टीम डिनर यांचा समावेश आहे. याव्यतिरिक्त, कर्मचारी सेंट पॉल्स कॅथेड्रल, लंडन ब्रिज, बिग बेन, बकिंगहॅम पॅलेस, पिकाडिली सर्कस, ट्राफलगर स्क्वेअर आणि मॅडम तुसाद यांसारख्या प्रमुख लंडन स्थळांना भेट देतील. तसेच, थेम्स नदीवर क्रूझचा आनंदही घेतील.
