पुणे महापालिकेने मिळकतकर थकबाकीदारांसाठी सुरू केलेल्या अभय योजनेत दंडातील ७५ टक्के सवलत दिली जात आहे. मात्र, योजना जाहीर करताना पूर्वीच्या लाभधारकांना यंदा सवलत मिळणार नसल्याचे स्पष्ट करण्यात आले होते. मात्र, सरसकट थकबाकीदारांना या योजनेचा लाभ देण्याच्या शिवसेनेने (उद्धव बाळासाहेब ठाकरे) केलेल्या मागणीला अखेर यश मिळाले आहे. पालिकेच्या स्थायी समितीने या निर्णयावर शिक्कामोर्तब केले आहे.
शिवसेनेच्या शिष्टमंडळाने महापालिका आयुक्त नवल किशोर राम यांना दिलेल्या निवेदनात दरवर्षी वेळेवर कर भरणाऱ्यांना केवळ दोन टक्क्यांची सवलत अपुरी असल्याचे स्पष्ट केले होते. यापूर्वी अभय योजनेत लाभ न घेतलेल्या थकबाकीदारांना तब्बल ७५ टक्के दंडमाफीचा निर्णय घेतला होता. यामुळे त्या थकबाकीदारांवर अन्यायाची भावना होती. त्यामुळे सरसकट थकबाकीदारांसाठी ही योजना राबवावी, अशी मागणी शिवसेनेने केली होती. यावेळी शिवसेनेचे राज्य संघटक वसंत मोरे, शहरप्रमुख संजय मोरे, गजानन थरकुडे, माजी गटनेते अशोक हरणावळ, संजय भोसले, माजी नगरसेवक प्रशांत बधे, माजी नगरसेविका श्वेता चव्हाण आदी उपस्थित होते.
दरम्यान, महापालिकेची मिळकतकर अभय योजना १५ नोव्हेंबर ते १५ जानेवारी २०२६ दरम्यान राबवली जात असून, ७५ टक्के दंडमाफी देण्यात आली आहे. अवघ्या १३ दिवसांत ६५ कोटींचे उत्पन्न जमा झाल्याचा दावा पालिकेने केला आहे. योजनेतून तब्बल एक हजार कोटींचे उत्पन्न मिळण्याचा अंदाज व्यक्त केला जात आहे. प्रारंभी जुन्या अभय योजनांचा लाभ घेऊन पुन्हा थकबाकीदार झालेल्यांना वगळण्यात आले होते. शिवसेनेने मागणी केल्यानंतर प्रशासनाने भूमिका बदलत त्यांनाही योजनेत सामावून घेण्याचा प्रस्ताव ठेवला आणि स्थायी समितीने तो मंजूर केला. त्यामुळे शिवसेनेच्या मागणीला ठोस यश मिळाले आहे.
