लोटे एमआयडीसी येथील लक्ष्मी ऑर्गेनिक कंपनीविरोधात शिवसेनेने आक्रमक भूमिका घेतली असून ‘तो जीवघेणा प्रकल्प तत्काळ बंद करा अन्यथा जनआंदोलन उभे करू’ असा इशारा आज जिल्हाधिकाऱ्यांना दिला. या वेळी शिवसेना जिल्हाप्रमुख दत्ताजी कदम यांच्यासह शिवसेना पदाधिकाऱ्यांनी आज रत्नागिरी जिल्हावासीयांचे मनोगत मांडले.
इटलीतील नागरिकांसाठी जीवघेणी ठरलेली मिटेनी पीएफएएस उत्पादन रत्नागिरीच्या लोटे एमआयडीसीत होत असल्याचे उघडकीस आल्यानंतर रत्नागिरी जिह्यात खळबळ उडाली आहे. शिवसेनेने या लक्ष्मी ऑर्गेनिक कंपनीविरोधात आक्रमक पवित्रा घेतला. या निवेदनात इटली देशाने बंदी आणलेला प्रकल्प लोटे एमआयडीसीमध्ये सुरू करण्यात आल्याबाबत संताप व्यक्त केला. ‘फोरएव्हर केमिकल’ म्हणून ओळख असलेली रसायने कंपनीत तयार केली जात होती. ती मानवी शरीरात आणि पर्यावरणात बराच काळ टिकून रहात असून त्याद्वारे विविध आजार होत असल्याने इटली सरकारने या कंपनीवर बंदी आणल्याचे म्हटले आहे.
शिवसेनेने निवेदनात पुढे असे म्हटले आहे की, मिटेनी पीएफएएस या रासायनिक कंपनीची यंत्रसामुग्री लक्ष्मी ऑर्गेनिक इंडस्ट्रीजच्या विवा लाईफ सायन्सेस या उपकंपनीने खरेदी करून त्यांचा वापर रत्नागिरी जिह्यातील लोटे एमआयडीसीत केला आहे. हा प्रकल्प प्रदूषणकारी असून तो तत्काळ बंद करावा अशी मागणी करण्यात आली आहे.
