आपले मतदान कुठे आणि कोणत्या केंद्रात आहे याची माहिती मिळण्यासाठी यापूर्वी मतदारांना उमेदवारांकडून येणाऱ्या व्होटर स्लिपवर अवलंबून राहायला लागायचे. स्लिप मिळालीच नाही तर बूथवर शोधाशोध करावी लागायची. मात्र उल्हासनगर पालिकेने एक पोर्टल तयार केले आले. त्यामुळे या पालिका निवडणुकीत मतदारांना एका क्लिकवर व्होटर स्लिप, मतदान केंद्राचा पत्ता मिळणार आहे. डिजिटल क्रांती केलेली उल्हासनगर ही राज्यातील पहिली पालिका असल्याचा दावा प्रशासनाने केला आहे.
पोर्टल तसेच महापालिकेच्या मुख्य संकेतस्थळावर निवडणुकीशी संबंधित सर्व महत्त्वाचे दस्तऐवज उपलब्ध करून देण्यात आले आहेत. तसेच वैध नामनिर्देशन पत्रे आणि माघार घेतलेल्या उमेदवारांची यादी, प्रभागनिहाय अंतिम मतदार यादी आणि पुरवणी मतदार यादी, प्रारूप व अंतिम प्रभागरचना आणि सुधारित अधिसूचना ही सर्व माहिती ऑनलाइन कळणार आहे. पोर्टलच्या उद्घाटनप्रसंगी निवडणूक अधिकारी तथा आयुक्त मनीषा आव्हाळे, अतिरिक्त आयुक्त किशोर गवस, निवडणूक निर्णय अधिकारी बाळासाहेब तिडके, गणेश सांगळे, विशाल जाधवर, विजयकुमार वाकोडे, मुकेश पाटील, डॉ. संजय शिंदे, पोलीस उपायुक्त सचिन गोरे, उपायुक्त विशाखा मोटघरे, जनसंपर्क अधिकारी अजय साबळे, सहाय्यक आयुक्त गणेश शिंपी उपस्थित होते.
पोर्टलमुळे मतदार यादीतील भाग क्रमांक, अनुक्रमांक आणि इतर वैयक्तिक माहिती तत्काळ पाहता येईल. निवडणूक लढवणाऱ्या उमेदवारांची प्रतिज्ञापत्रे आणि प्रभागांची रचना सहज पाहता येईल. https://umc. localbody.org, https://umcvoter-search.com, https://www.umc. gov.in या लिंकवर क्लिक केल्यानंतर पालि का निवडणुकीसंबंधी सर्व माहिती मतदारांना मिळणार आहे.
