महानगरपालिका निवडणुकीसाठी 15 जानेवारीला मतदान प्रक्रिया पार पडणार आहे. त्यासाठी 17 प्रभागांमध्ये 345 मतदान केंद्रांवर सुविधा असणार आहे. त्याची तयारी पूर्ण झाली आहे. मतदान प्रक्रियेनंतर सर्व ईव्हीएम मशीन एमआयडीसीतील वखार महामंडळाच्या 6 नंबरच्या गोडाऊनमध्ये केलेल्या स्ट्राँग रूममध्ये ठेवण्यात येणार आहेत. 16 जानेवारीला सकाळी 10 वाजता 7 नंबर गोडाऊनमध्ये मतमोजणी होणार असून, त्याची तयारीही प्रशासनाकडून पूर्ण झाली असल्याची माहिती आयुक्त तथा प्रशासक यशवंत डांगे यांनी दिली.
मतदान प्रक्रियेसाठी 1800 कर्मचारी नियुक्त केले आहेत. मतमोजणीसाठी 68 मतमोजणी पर्यवेक्षक व 68 सहायक यांची नियुक्ती केली आहेत. 16 जानेवारीला सकाळी 9.30 वाजता मतमोजणीची प्रक्रिया सुरू होईल. सकाळी 9.30 वाजता स्ट्राँग रूम उमेदवार किंवा त्यांच्या प्रतिनिधींच्या, तसेच मुख्य निवडणूक निरीक्षक आदित्य जीवने व निवडणूक निरीक्षक श्रीमंत हारकर यांच्या समक्ष उघडण्यात येणार आहे. सर्वप्रथम सकाळी 10 वाजता टपाली मतपत्रिका मोजण्यास सुरुवात करण्यात येईल. त्यानंतर ईव्हीएममधील मतांची मोजणी सुरू होणार आहे, असे आयुक्त यशवंत डांगे यांनी सांगितले.
