अजितदादांच्या निधनाचे बातमी त्यांच्या आईला कळू नये म्हणून दादांच्या फार्महाऊसवरील व्यवस्थापकाने टीव्हीची केबल तोडली. त्यानंतर दादांना भेटण्यासाठी त्या चालतच निघाल्याची माहिती फार्म हाऊसवरील व्यवस्थापक संपत धायगुडे यांनी दिली.
संपत धायगुडे यांनी सांगितले की, सकाळी सात वाजता नेहमीप्रमाणे अजितदादांच्या आई फार्महाऊसवरती टीव्ही पाहत होत्या. त्यांना नाश्ता देण्याची तयारी करत होतो. त्यानंतर सकाळी साडेआठ वाजता अजितदादांच्या विमान अपघाताची बातमी टीव्हीवर येत होती. आईंनी लगेच आम्हाला विचारले अरे दादांचा अपघात झालाय का?, पण आईलाही वाटले त्यांना खरचटले असेल, काही झाले नसेल.
बारामतीत हॉस्पिटलमध्ये दादांना आणल्याची टीव्हीवरून बातमी आली. त्यावेळी आम्ही लगेच आईला पुढच्या बातम्या कळू नयेत यासाठी बंगल्यावरील टीव्हीची केबल तोडली आणि टीव्ही बंद पडल्याचे सांगितले. त्यांचा मोबाईलही फ्लाईट मोडवर टाकून दिला. काही झाले नसल्याचे आम्ही त्यांना सांगत होतो. पण दादांना भेटून येऊ चला असे म्हणून त्या फार्महाऊसच्या बाहेर चालतच निघाल्या होत्या. ड्रायव्हरने गाडी बंद पडल्याचेही सांगितले, पण त्या ऐकल्या नाहीत. शेवटी नाइलाजाने त्यांना आम्ही बारामती येथील बंगल्यावर घेऊन गेलो, अशी माहिती संपत धायगुडे यांनी दिली आहे.
चार दिवसांपूर्वीच आईशी भेट
चार दिवसांपूर्वी अजितदादा त्यांच्या फार्महाऊसवर आईला भेटण्यासाठी आले होते. शनिवारी सकाळी साडेसात वाजता ते फार्महाऊसवर आले होते. आईसोबत त्यांनी तब्बल पाऊण तास गप्पा मारल्या. त्यानंतर शेतातील सर्व कामगारांना कामाच्या सूचना दिल्या. शेतात नवनवे वृक्षारोपण करण्याच्या सूचनाही कर्मचाऱ्यांना केल्या. कर्मचाऱ्यांची आपुलकीने विचारपूस करून ते पुढील कार्यक्रमासाठी गेले, असेही संपत धायगुडे यांनी सांगितले.
