अमेरिका इराणमध्ये सामंजस्य करार झाल्याने जगाने सुटकेचा निश्वास सोडला होता. त्यानंतर आता चीन आणि तैवानमधील संघर्ष वाढण्याची शक्यता आहे. तैवानच्या आसपास चीनच्या लष्करी हालचाली सातत्याने वाढत आहेत. तैवानच्या संरक्षण मंत्रालयाने (MND) रविवारी सकाळी माहिती दिली की, त्यांच्या परिसरात दोन चिनी लष्करी विमाने, आठ चिनी नौदल युद्धनौका आणि चार सरकारी जहाजे असल्याचे आढळून आले आहे. तैवानच्या लष्कराने या सर्व हालचालींवर लक्ष ठेवून प्रत्युत्तरात्मक कारवाई केली आहे.
तैवानच्या संरक्षण मंत्रालयाच्या माहितीनुसार, रविवार सकाळी ६ वाजेपर्यंत, पीपल्स लिबरेशन आर्मीची (PLA) दोन विमाने आणि पीपल्स लिबरेशन आर्मी नेव्हीची (PLAN) आठ जहाजे तैवानच्या आसपास फिरत असल्याचे दिसून आले. मंत्रालयाने ही माहिती ‘एक्स’ (X) या सोशल मीडिया प्लॅटफॉर्मवर प्रसिद्ध केली आणि सांगितले की तैवानचे सशस्त्र दल या संपूर्ण घडामोडींवर सतत लक्ष ठेवून आहे. वाढत्या चिनी घुसखोरीच्या पार्श्वभूमीवर, तैवानने आपल्या लष्कराला सतर्क केले आहे.
शनिवारी चीनच्या लष्कराचीही हालचाल दिसून आली होती. तैवानने पाच चिनी लष्करी विमाने, नऊ युद्धनौका आणि पाच सरकारी जहाजे दिसल्याने म्हटले आहे. यापैकी एका विमानाने तैवान सामुद्रधुनीची मध्यरेषा ओलांडून तैवानच्या नैऋत्येकडील हवाई संरक्षण ओळख क्षेत्रात (ADIZ) प्रवेश केला. तैवानच्या लष्कराने तात्काळ प्रत्युत्तर दिले.
चीनच्या वाढत्या लष्करी हालचालींच्या पार्श्वभूमीवर, तैवानदेखील आपली संरक्षण क्षमता मजबूत करण्यासाठी प्रयत्न करत आहे. या महिन्यात, तैवानच्या पहिल्या स्वदेशी पाणबुडीने काओशुंग बंदराजवळ सागरी चाचण्यांची आणखी एक फेरी पूर्ण केली. वृत्तानुसार, ही पाणबुडीची १५ वी सागरी चाचणी आणि नववी डुबकी चाचणी होती. तैवानच्या सागरी सुरक्षा धोरणातील हा एक महत्त्वपूर्ण टप्पा मानला जातो.
तैवान आणि चीन यांच्यातील वाद अनेक दशकांपासून सुरू आहे. बीजिंग तैवानला आपल्या भूभागाचा अविभाज्य भाग मानते आणि भविष्यातील एकीकरणाची मागणी करते. दुसरीकडे, तैवान स्वतःचे सरकार, सैन्य आणि आर्थिक प्रणाली असलेले एक स्वतंत्र आणि लोकशाही राष्ट्र म्हणून कार्यरत आहे.
अलिकडच्या वर्षांत चीनने तैवानच्या आसपास लष्करी दबाव वाढवला आहे. बीजिंग लढाऊ विमाने, ड्रोन आणि युद्धनौका तैनात करून सातत्याने आपली ताकद दाखवत आहे. याला प्रत्युत्तर म्हणून, तैवान आपली संरक्षण तयारी मजबूत करत आहे. परिणामी, तैवानची सामुद्रधुनी पुन्हा एकदा आशिया-पॅसिफिक क्षेत्रातील सर्वात संवेदनशील सुरक्षा समस्यांपैकी एक बनत आहे.
