रविवारपासून सुरू होणाऱ्या तीन सामन्यांच्या टी-२० मालिकेत टीम इंडियाचा संघ अफगाणिस्तानच्या आव्हानाचा सामना करणार आहे. मात्र, मालिकेतील पहिल्याच सामन्यापूर्वी संघ व्यवस्थापनासमोर प्लेइंग-११ ची निवड करताना मोठा पेच निर्माण झाला आहे. १५ वर्षीय युवा फलंदाज वैभव सूर्यवंशीची आक्रमक खेळी की अनुभवी आणि कल्पक संजू सॅमसन, यापैकी कोणाला सलामीची संधी द्यायची, यावर जोरदार चर्चा रंगली आहे.
जपानमध्ये होणाऱ्या आगामी आशियाई क्रीडा स्पर्धेच्या (Asian Games) तयारीच्या दृष्टीने मुख्य प्रशिक्षक गौतम गंभीर आणि कर्णधार श्रेयस अय्यर या दोघांनाही पुरेशी संधी देण्याचा प्रयत्न करू शकतात. अभिषेक शर्मा आणि संजू सॅमसन ही स्थिर सलामी जोडी ठरलेली असताना, वैभवची आक्रमक फलंदाजी अफगाण गोलंदाजांवर भारी पडू शकते. मात्र, इंग्लंड दौऱ्यात तीन सामन्यांनंतर संजूला वगळल्याने झालेल्या चर्चेनंतर संघ व्यवस्थापन काय निर्णय घेणार, याकडे सर्वांचे लक्ष आहे.
इशान किशनच्या दुखापतीमुळे दोघांना संधी शक्य?
सराव सत्रादरम्यान जसप्रीत बुमराहच्या वेगाचा सामना करताना वैभव सूर्यवंशी काहीसा चाचपडताना दिसला, तर संजू सॅमसन चांगल्या लयीत दिसून आला. दरम्यान, दुलीप ट्रॉफीच्या अंतिम सामन्यात २७० आणि ८० धावांची धडाकेबाज खेळी करणाऱ्या इशान किशनला सराव सत्रात पाठीचा त्रास सुरू झाला. जर इशान पहिल्या सामन्यातून बाहेर पडला, तर संजू आणि वैभव या दोघांनाही एकाच वेळी प्लेइंग-११ मध्ये खेळण्याची संधी मिळू शकते.
फिरकी गोलंदाजी आणि कोटलाची खेळपट्टी
फिरोजशाह कोटला मैदानावर महिनाभर चाललेल्या दिल्ली प्रीमियर लीगमुळे (DPL) खेळपट्टी संथ राहण्याची शक्यता आहे. अशा वेळी राशिद खान, नूर अहमद आणि मुजीब उर रहमान या अफगाणिस्तानच्या जागतिक दर्जाच्या फिरकीपटूंचा सामना करणे भारतासाठी मोठे आव्हान असेल. भारतीय संघात अष्टपैलू अक्षर पटेल आणि वॉशिंग्टन सुंदर यांचे स्थान निश्चित मानले जात असून, तिसरा फिरकीपटू म्हणून वरुण चक्रवर्तीला संधी मिळणार की मध्यमगती गोलंदाज यश ठाकूरला, हे पाहणे महत्त्वाचे ठरेल. बुमराह, अर्शदीप सिंग आणि नितीश कुमार रेड्डी यांचे वेगवान माऱ्यात स्थान निश्चित दिसते.
दोन्ही संघ खालीलप्रमाणे:
टीम इंडिया: श्रेयस अय्यर (कर्णधार), संजू सॅमसन (यष्टीरक्षक), अभिषेक शर्मा, इशान किशन (यष्टीरक्षक), तिलक वर्मा, नितीश कुमार रेड्डी, शिवम दुबे, वॉशिंग्टन सुंदर, अक्षर पटेल, जसप्रीत बुमराह, अर्शदीप सिंग, वैभव सूर्यवंशी, यश ठाकूर, वरुण चक्रवर्ती, रवी बिश्नोई.
अफगाणिस्तान: इब्राहिम झाद्रान (कर्णधार), दरविश रसूली, नूर उल रहमान, रहमानुल्लाह गुरबाज (यष्टीरक्षक), सेदिकुल्लाह अटल, अजमतुल्लाह ओमरझाई, राशिद खान, मोहम्मद नबी, गुलबदिन नायब, नांगेलिया खरोटे, अब्दुल्ला अहमदझाई, फजलहक फारूकी, नवीन-उल-हक, मुजीब उर रहमान, नूर अहमद.
