मोबाईल एक्सेसरीज विक्रीचा व्यवसाय सुरू करण्यासाठी 70 लाखांचे कर्ज मिळवून देण्याचे आमिष दाखवत भामट्याने सहा कोटींचा गंडा घातल्याची घटना समोर आली आहे. भामटा सूरजपालसिंह चौहान याने व्यावसायिकांकडून कर्ज काढण्यासाठी लागणारी सर्व कागदपत्रे घेतली आणि त्या कागदपत्रांच्या मदतीने विविध बॅंकांमधून सहा कोटींचे कर्ज घेतले. याप्रकरणी व्यावसायिक नरपतकुमार चौधरी यांनी दिलेल्या तक्रारीनंतर तालुका पोलिसांनी 24 तासांच्या आत भामट्याच्या मुसक्या आवळल्या आहेत.
व्यावसायिक नरपतकुमार चौधरी (28) यांनी सप्टेंबर 2019 मध्ये भिवंडीत मोबाईल एक्सेसरीज विक्रीचे दुकान सुरू केले होते. 2020 मध्ये त्यांनी स्वतःची एक्सेसरीज बनवणारी कंपनी सुरू करण्याचे ठरवले. त्यासाठी लागणारी इंजेक्शन मोल्डिंग मशीन व इतर साहित्य खरेदीसाठी त्यांना 63 लाखांचे कर्ज हवे होते. याचदरम्यान ते जी पॉवर इंटरप्रायजेस कंपनीचे सूरजपालसिंह चौहान याच्या संपर्कात आले. नरपतकुमार यांना कर्ज मिळवून देण्यासाठी आवश्यक कागदपत्रे सूरजपालसिंह याने स्वतःच्या ताब्यात घेतले आणि विविध बँक आणि खासगी वित्तीय संस्थांमधून सहा कोटी 29 लाख 61 हजार 281 रुपयांचे कर्ज काढले. याप्रकरणी पोलिसांनी 24 जणांविरोधात फसवणुकीचा गुन्हा दाखल केला असून मुख्यसूत्रधार सूरजपालसिंह याला जेरबंद केले आहे.
