ब्रीच कँडी परिसरातील नागरिकांच्या तक्रारीनंतर मुंबई कोस्टल रोडवरील उत्तर दिशेकडे तयार करण्यात आलेल्या ‘म्युझिकल रोड’चा आढावा घेण्याची प्रक्रिया सुरू करण्यात आली आहे. बृहन्मुंबई महानगरपालिकेने (BMC) आपल्या कन्सल्टंटला संभाव्य उपाययोजना तपासण्याचे निर्देश दिले असून, या रस्त्यामुळे निर्माण होणाऱ्या आवाजाचा परिणाम मोजण्यासाठी नॉइज डेसिबल अभ्यास करण्याचे आदेश दिले आहेत.
11 फेब्रुवारी रोजी सुरू करण्यात आलेला हा ‘म्युझिकल रोड’ हिंदुस्थानातील पहिला असा रस्ता म्हणून सादर करण्यात आला होता. वाहनचालकांची गाडी 70 ते 80 किमी प्रतितास वेगाने विशेष तयार केलेल्या ग्रूव्ह्सवरून गेल्यास ए. आर. रेहमान यांच्या जय हो या गाण्याची धून ऐकू येईल, अशा पद्धतीने या रस्त्याची रचना करण्यात आली आहे. मात्र, नवकल्पना म्हणून सादर करण्यात आलेल्या या सुविधेला परिसरातील रहिवाशांनी तीव्र विरोध दर्शवला आहे.
तांत्रिक मूल्यांकन
नॉइज डेसिबल अभ्यास हा एखाद्या भागातील आवाजाची तीव्रता मोजण्यासाठी केला जाणारा तांत्रिक अभ्यास आहे. यामध्ये आवाजाची पातळी डेसिबल मध्ये मोजली जाते. यासाठी साउंड लेव्हल मीटरसारख्या उपकरणांचा वापर केला जातो. निवासी भागांमध्ये दिवसातील वेगवेगळ्या वेळांमध्ये आवाजाची पातळी तपासली जाते, जेणेकरून तो आवाज शहरी परिसरासाठी ठरवलेल्या मर्यादेत आहे की नाही हे निश्चित करता येते.
अशा अभ्यासांच्या निष्कर्षांच्या आधारे नागरी प्रशासन आणि पर्यावरणीय यंत्रणा आवाज प्रदूषण कमी करण्यासाठी आवश्यक बदल, मर्यादा किंवा उपाययोजना ठरवतात.
650 हून अधिक कुटुंबांची तक्रार
माहितीनुसार, ब्रीच कँडी परिसरातील 650 हून अधिक कुटुंबांनी गेल्या महिन्यात औपचारिक तक्रारपत्रावर स्वाक्षऱ्या करून ते मुंबई महापालिका आयुक्त भुषण गगराणी यांच्याकडे दिले. या पत्रात रहिवाशांनी म्युझिकल रोडमुळे सतत ध्वनी प्रदूषण निर्माण होत असल्याची तक्रार केली आहे.
रहिवाशांच्या म्हणण्यानुसार, गाड्या ग्रूव्ह्सवरून जाताना निर्माण होणारा आवाज परिसरातील घरांपर्यंत पोहोचतो. त्यामुळे खिडक्या उघड्या ठेवणेही कठीण होत असल्याचे त्यांनी सांगितले. तसेच, या प्रकल्पाचा नेमका फायदा काय, असा प्रश्न उपस्थित करत शांत आणि राहण्यास योग्य परिसर निर्माण करण्याच्या उद्दिष्टालाच हा उपक्रम विरोधाभासी असल्याचे त्यांनी नमूद केले आहे.
महापालिकेचा प्रतिसाद
महापालिका अधिकाऱ्यांनी नागरिकांच्या चिंतेची दखल घेतली असून प्रकल्पासाठी नियुक्त कन्सल्टंटला तांत्रिक उपाय सुचवण्यास सांगितले आहे. रस्त्याच्या मूळ डिझाइनमध्ये मोठा बदल न करता त्रास कमी करता येईल का, याचीही तपासणी केली जात आहे.
तसेच, विशेषतः रात्रीच्या वेळेत डेसिबल पातळीचे निरीक्षण सुरू करण्यात आले असून नॉइज अभ्यासाचे निष्कर्ष आल्यानंतर पुढील निर्णय घेतले जातील, असे अधिकाऱ्यांनी स्पष्ट केले.
