मुंबई गोवा महामार्गावर भीषण कार अपघात, चालकाचा मृत्यू

मुंबई गोवा महामार्गावरील निगडे गावाच्या हद्दीत भरधाव वेगातील कार रस्त्याच्या कडेला आलेल्या सिमेंटच्या मोरीला धडकून झालेल्या अपघातात चालकाचा मृत्यू झाला. ओंकार वसंत सातपुते असे या कारचालकाचे नाव असून तो पुणे येथील असल्याचे पोलिसांकडून सांगण्यात आले.

ओंकार सातपुते (31) हा आपल्या ताब्यातील कार घेऊन मुंबई गोवा महामार्गाने जात होता. खेड तालुक्यातील निगडे गावच्या हद्दीत तो आला असता एका वळणावर त्याचा कारवरील ताबा सुटला आणि ती कार रस्त्याच्या कडेला असलेल्या सिमेंटच्या मोरीवर जोरात आदळली. या अपघातात चालक ओंकार सातुपुते याला गंभीर दुखापत झाल्याने त्याचा जागीच मृत्यू झाला.

अपघाताची खबर मिळताच खेड पोलीस तात्काळ घटनास्थळी दाखल झाले. पोलिसांनी या दुर्घटनेचा पंचनामा करून ओंकार याचा मृत्यदेह उत्तरीय तपासणीसाठी पाठवून केला. पोलसांनी या अपघाताची नोंद केली असून खेड पोलीस या प्रकरणी अधिक तपास करत आहेत.