‘संगीत रामायण’ लोकार्पण सोहळा, ‘गीतरामायणा’ ची हिंदी सांगीतिक मैफिल रंगणार

321

सामना ऑनलाईन । मुंबई

शब्दप्रभू ‘गदिमा’ आणि ज्येष्ठ संगीतकार सुधीर फडके या दोन दिग्गजांच्या प्रतिभेचा सर्वांगसुंदर अविष्कार म्हणजे अथक परिश्रमातून निर्माण झालेले ‘गीतरामायण’. आजवर देश-परदेशात गीतरामायणाचे अनेक कार्यक्रम झाले व या कार्यक्रमांना रसिकांकडून खूप चांगला प्रतिसाद मिळाला आहे. मराठी माणसाच्या सांस्कृतिक जीवनाचे वैभव असलेल्या गीतरामायणाच्या हिंदी रूपातील सांगीतिक मैफिलीचा आनंद घेण्याची संधी लवकरच रसिकांना उपलब्ध होणार आहे.

हिंदी गीतरामायण प्रकाशन समितीच्या सौजन्याने गीतरामायणावर आधारित सुनील सुधाकर देशपांडे रचित ‘संगीत रामायण’ या भावानुवादाचा लोकार्पण सोहळा रविवार 25 ऑगस्टला सायं. 5.30 वा. प्राचार्य बी.एन वैद्य सभागृह, राजा शिवाजी विद्यालय येथे रंगणार आहे. या कार्यक्रमासाठी प्रमुख पाहुणे म्हणून महाराष्ट्र राज्याचे सांस्कृतिक कार्यमंत्री विनोद तावडे उपस्थित राहणार आहेत. आचार्य सूर्यप्रकाशजी दीक्षित (पूर्व हिंदी विभागप्रमुख, लखनऊ विश्वविद्यालय), आनंदजी माडगूळकर (कार्यकारी विश्वस्त, ग.दि.माडगूळकर प्रतिष्ठान), शीतला प्रसादजी दुबे, (अध्यक्ष, हिंदी साहित्य अकादमी, मुंबई विभाग), सुंदरचंदजी ठाकूर (संपादक, नवभारत टाइम्स) आदी मान्यवर उपस्थित राहणार आहेत. या सोहळ्यानंतर सुप्रसिद्ध गायिका संगीतकार आशा खाडिलकर यांच्या संगीतसंयोजनांतर्गत ‘संगीत रामायणातील’ काही निवडक गाणी सादर केली जातील.

‘‘रसिकांना अभिमान वाटावा अशा मराठी भाषेतील वाङ्मयीन व सांगितिक अशा ज्या निवडक कलाकृती आहेत, त्यात गीतरामायणाचे स्थान अग्रस्थानी आहे. या गीतांचा सुश्राव्य आनंद हिंदी भाषेमध्ये ही अनुभवायला मिळावा या उद्देशाने आम्ही ‘संगीत रामायण’ या कार्यक्रमाची संकल्पना साकारली’’ असल्याचे रचनाकार सुनील देशपांडे सांगतात. जीवनमूल्यांची ओळख करून देणारा गीतरामायणाचा हा ठेवा इतर भाषिक लोकापर्यंत पोहचवण्याचा प्रयत्न रसिकांना वेगळी अनुभूती देणारा असेल हे नक्की.