भारतीय जनता पक्षाचे नेते आणि मंत्री राधाकृष्ण विखे-पाटील यांनी शेतकरी कर्जमाफीबाबत वादग्रस्त विधान केले होते. आधी कर्जबाजारी होतात, नंतर कर्जमाफी मागतात, असे विखे-पाटील म्हणाले होते. त्यांच्या या वक्तव्यामुळे शेतकऱ्यांमध्ये संतापाची लाट उसळली असून आता ‘प्रहार’ संघटनेचे नेते, माजी राज्यमंत्री बच्चू कडू यांनी विखे-पाटलांची गाडी फोडणाऱ्याला 1 लाखाचे बक्षीस जाहीर केले आहे.
नाव राधाकृष्ण आहे, मात्र कृत्ये कंसाची करायची असतील तर कंसाची ही अवलाद मुख्यमंत्र्यांनी हाकलून लावली पाहिजे, असा संताप बच्चू कडू यांनी क्यक्त केला. मुख्यमंत्री एकीकडे कर्जमाफीची घोषणा करतात, तर दुसरीकडे वाचाळवीर मंत्री अशी विधाने करतात. लोक मारत नाही याचे आभार माना आणि ही नालायकी थांबवा, असेही बच्चू कडू म्हणाले. या वेळी त्यांनी विखे पाटलांची गाडी फोडणाऱ्याला एक लाखाचे बक्षीस देण्याची घोषणा केली. तसेच मला जर त्यांची गाडी दिसली तर मीच फोडणार, असेही ते म्हणाले.
