संपूर्ण जगभरात ओमायक्रोन विषाणूचा संसर्ग अतिशय वेगाने पसरत आहे. याबद्दल आज झालेल्या मंत्रिमंडळाच्या बैठकीत चिंता व्यक्त करण्यात आली. या पार्श्वभूमीवर ओमायक्रोनचा संसर्ग रोखण्यासाठी राज्यातील लसीकरणाचा वेग वाढवण्याचे आदेश मुख्यमंत्री उद्धव ठाकरे यांनी दिले.
- गेल्या 12 तासांत संपूर्ण जगात ओमायक्रोनच्या रुग्णांत 45 टक्के वाढ झाली असून 54 देशांत याचा प्रसार झाला आहे.
- फ्रान्समध्ये दैनंदिन रुग्ण 40 हजारांच्या पुढे आढळत असून जर्मनीत ही संख्या 50 हजारांच्या आसपास आहे.
- ऑस्ट्रियामध्येदेखील दररोज सात हजारच्या आसपास नवीन रुग्ण आढळत आहेत.
- दक्षिण आफ्रिकेत नवीन रुग्णांत मोठी वाढ झाली असून दररोज दुपटीने रुग्ण आढळत आहेत.
- अमेरिकेतदेखील नोव्हेंबर 2020 सारखी परिस्थिती उद्भवली असून दररोज एक लाखापेक्षा अधिक रुग्ण आढळत आहेत.
राज्यातील लसीकरणाचा उच्चांक
या सगळ्या पार्श्वभूमीवर महाराष्ट्रात सध्या कोरोना प्रतिबंधक लसींचे 12 कोटी 3 लाख 18 हजार 240 डोसेस दिले असून 4 कोटी 37 लाख 46 हजार 512 जणांनी लसीचे दोन्ही डोस घेतले आहेत. 7 कोटी 65 लाख 71 हजार 728 लोकांनी एक डोस घेतला आहे.
18 ते 44 वयोगटात 76.69 टक्के लोकांनी कमीत कमी एक डोस तर 45 पेक्षा अधिक वयोगटातील 85.25 टक्के लोकांनी एक डोस घेतलेला आहे अशी माहिती मंत्रिमंडळाच्या बैठकीत देण्यात आली.
