रुग्ण सापडला तर इमारत ‘सीलबंद’, कंटेनमेंट झोनची पालिकेने केली पुनर्रचना

1334

कोरोनाचा एक किंवा एकापेक्षा जास्त रुग्ण किंवा कोरोना संशयित रुग्ण सापडणाऱ्या इमारतींना आणि परिसराला पालिका सरसकट कंटेनमेंट झोन म्हणून जाहीर करत होती. मात्र, आता कंटेनमेंट झोनची पुनर्रचना करण्यात आली असून या पुढे ‘कंटेनमेंट झोन’ आणि ‘सीलबंद इमारती’ अशा दोन वेगवेगळ्या वर्गवारी करण्यात आल्या आहेत. या वर्गवारीमुळे पालिका आणि पोलीस कर्मचारी यांच्यावरील ताण कमी होणार असून कोरोना रोखण्यासाठी पालिकेला अधिक प्रभावीपणे काम करता येणार आहे.

कोरोनाच्या पार्श्वभूमीवर, मुंबईत ज्या भागात कोरोनाबाधितांची व क्वारंटाइन करण्यात आलेल्या व्यक्तींची संख्या तुलनेने अधिक आहे, अशा परिसरांमध्ये ‘कंटेनमेंट झोन’ तयार करण्यात आले आहेत. या झोनमधील नागरिकांना त्यांच्या परिसराबाहेर न जाण्याच्या तसेच बाहेरील परिसरातील नागरिकांना आत जाण्यास परवानगी नसते. पालिका आणि पोलीस कर्मचारी तेथे तैनात ठेवले जातात. त्याचबरोबर अशा भागावर सीसीटीव्हीच्या माध्यमातून नजर ठेवण्यात येते. मात्र, एकाच परिसरातील एकापेक्षा अधिक इमारतींना किंवा भागांना ‘कंटेनमेंट झोन’ म्हणून घोषित केल्यामुळे पोलिसांच्या व महापालिकेवर नियोजन आणि अंमलबजावणीचा ताण येत होता. त्या पार्श्वभूमीवर, मुंबई महानगरपालिकेने आता कंटेनमेंटची पुनर्रचना केली असून कंटेनमेंट झोनबरोबर ‘सीलबंद इमारती’ अशी आणखी एक वर्गवारी तयार केली आहे.

सीलबंद इमारतीची व्याख्या

एखाद्या परिसरातील एका इमारतीमध्ये एक कोरोना पॉझिटिव्ह रुग्ण किंवा काही संशयित रुग्ण अथवा लक्षणे नसलेले रुग्ण आढळले तर अशा इमारतीला किंवा त्या इमारतीच्या भागाला ‘सीलबंद’ म्हणून घोषित करण्यात येईल. अशा इमारतीच्या/सोसायटीच्या व्यवस्थापकीय समितीस याची माहिती देण्यात येईल. त्याचबरोबर सोसायटीतील इतर व्यक्तींना बाधा होऊ नये, यासाठी राबवावयाच्या खबरदारीच्या उपाययोजनांबाबत सविस्तर माहिती व मार्गदर्शन महापालिकेच्या आरोग्य खात्याद्वारे देण्यात येईल.

जबाबदारी सोसायटी समितीवर

सीलबंद इमारतीसाठी सोसायटीच्या समितीद्वारे स्थानिक किराणा दुकानदार, भाजीविक्रेते, मेडिकल दुकान इत्यादींशी संपर्क साधून सोसायटीच्या गरजांनुसार वस्तूंची वा सामानाची मागणी नोंदवली जाणार आहे. ‘ऑर्डर’ दिलेल्या सामानाची किंवा वस्तूंची ‘डिलिव्हरी’ ही सोसायटीच्या ‘एन्ट्री गेट’वर दुकानदारांद्वारे वा विक्रेत्यांद्वारे दिली जाणार आहे. त्यानंतर ऑर्डरनुसार सोसायटी सदस्याच्या दरवाज्यापर्यंत वस्तूची डिलिव्हरी करण्याची व्यवस्था ही सोसायटीच्या समितीद्वारे केली जाणार आहे.

पालिका, पोलीस कर्मचारयांवरील ताण कमी होणार

सोसायटीतील ज्या व्यक्तीला किंवा कुटुंबाला ‘क्वारंटाइन’ करण्यात आले आहे, किंवा जी व्यक्ती बाधित असून जिला लक्षणे नसल्यामुळे घरच्या घरीच ‘क्वारंटाइन’ करण्यात आले आहे अशा व्यक्तींच्या भ्रमणध्वनीमध्ये ‘आरोग्य सेतु ॲप’ इन्स्टॉल करवून घेण्याची कार्यवाही समिती करेल. तसेच आवश्यकतेनुसार औषधी व सामान ‘क्वारंटाइन’ करण्यात आलेल्या व्यक्तींच्या घराच्या दरवाजापर्यंत वेळेवर पोचतील, याचे नियोजन आणि व्यवस्थापन समितीला करायचे आहे. त्याचबरोबर सोसायटीतील एखाद्या व्यक्तीला कोरोनाची लक्षणे आढळल्यास त्याची माहिती पालिका कर्मचाऱ्यांना कळवण्याची जबाबदारीही समितीची असेल. त्यामुळे पालिका, पोलीस कर्मचाऱ्यांवरील ताण कमी होणार आहे.

  • एकाच परिसरातील एकापेक्षा अधिक इमारती किंवा एकापेक्षा अधिक भाग वा घरे ‘कंटेनमेंट झोन’ म्हणून घोषित करण्यात आली असल्यास, आता अशा परिसरांना एकच ‘कंटेनमेंट झोन’ म्हटले जाणार आहे.
  • प्रत्येक इमारतीवर देखरेख ठेवण्यासाठी स्वतंत्रपणे पोलिसांची नियुक्ती करण्याऐवजी, कमी मनुष्यबळात अधिक प्रभावी काम करणे शक्य होणार आहे. पोलीस दलाबरोबरच पालिकेचे अधिकारी व कर्मचारीदेखील या परिसरात जीवनावश्यक वस्तूंच्या उपलब्धतेसाठी आवश्यक ती कार्यवाही आणि नियोजन करीत आहेत. त्यामुळे महापालिकेला अधिक चांगल्या रीतीने मनुष्यबळ वापरता येणार आहे.
  • लक्षणे असलेले बाधित रुग्ण आणि घरच्या घरी ‘क्वारंटाईन’ करण्यात आलेल्या व्यक्ती, यांच्याद्वारे आणि आणि सोसायटीतील इतर सदस्य व रहिवाशांद्वारे संबंधित नियमांचे काटेकोरपणे पालन होत असल्याची खातरजमा समितीद्वारे वेळोवेळी करण्यात येईल. यामध्ये सोसायटीतील सर्व सदस्यांद्वारे ‘फिजिकल डिस्टन्सिंग’, मास्क वापरणे, काटेकोरपणे स्वच्छता पाळणे यासारख्या बाबींचा समावेश आहे.
  • सोसायटी परिसरात कोणत्याही विक्रेत्यास, घरकाम करणाऱ्या व्यक्तीस, परीट किंवा इतर कोणतीही सेवा देणाऱ्या व्यक्तीस प्रवेश करण्यास मज्जाव असेल.
  • महापालिका क्षेत्रात 2 हजार 801 ‘कंटेनमेंट झोन’ होते. पुनर्रचनेनुसार मुंबईत आता 661 ‘कंटेनमेंट झोन’ असून 1 हजार 110 ‘सीलबंद इमारती’ असल्याचे पालिकेने घोषित केले आहे.
आपली प्रतिक्रिया द्या