मुंबईतील दादर युनियन हे नाव म्हणजे शिस्तीचे प्रतीकच आहे. तुम्ही क्रिकेट खेळात असाल किंवा नसाल, पण तुमच्या अंगात शिस्त भिनलेली असेल तर तुम्ही कोणत्याही क्षेत्रात यशस्वी होऊ शकता, असे मत हिंदुस्थानचे माजी कर्णधार दिलीप वेंगसरकर यांनी व्यक्त केले. माटुंगा येथील दादर युनियन स्पार्ंटग क्लबमध्ये पार पडलेल्या विजय तुळपुळे 13 वर्षांखालील क्रिकेट स्पर्धेच्या पारितोषिक वितरण समारंभात ते बोलत होते. दादर युनियन संघाने लहान वयातच मला शिस्त शिकवली आणि त्याचा माझ्या संपूर्ण क्रिकेट कारकीर्दीत मोठा फायदा झाला, असे त्यांनी यावेळी सांगितले.
दरम्यान, स्पर्धेच्या अंतिम सामन्यात शिव सेवा संघाने एम.सी.सी. ठाणे संघावर 8 विकेट्सनी दणदणीत विजय मिळवत विजेतेपद पटकावले. प्रथम फलंदाजी करणाऱया एम.सी.सी. ठाणे संघाला शिव सेवा संघाच्या गोलंदाजांनी 26.3 षटकांत अवघ्या 86 धावांत गुंडाळले. आराध्य लाड (14 धावांत 2 विकेट), दर्श कदम (11 धावांत 2 विकेट) आणि सोहम (3 धावांत 2 विकेट) यांच्या अचूक गोलंदाजीमुळे ठाण्याच्या फलंदाजांना मोठी धावसंख्या उभारता आली नाही. नील चौहान (17), विराट सिंग (19), शार्दुल जोशी (15) आणि रचित पाटील (10) यांनीच दोन आकडी धावा केल्या.
87 धावांच्या माफक लक्ष्याचा पाठलाग करताना शिव सेवा संघाने सुरुवातीपासूनच सामन्यावर पकड मिळवली. सलामीवीर ख्रिस्तियानो बुथेल्लोने नाबाद 42 धावांची शानदार खेळी करत संघाचा विजय सोपा केला, तर श्रेयस गुळवेने 23 धावांची उपयुक्त साथ दिली.
