महाराष्ट्र प्रदूषण नियंत्रण मंडळाची कोणतीही परवानगी न घेता घातक रसायनाची बेकायदा वाहतूक केल्याप्रकरणी बोईसर पोलिसांनी टँकरचालकासह तिघांवर गुन्हा दाखल केला आहे. तारापूर औद्योगिक क्षेत्रात हा टँकर रसायनाची बेकायदा वाहतूक करत असताना पोलिसांनी पकडला होता. त्यानंतर टँकरमधील रसायनाचे नमुने प्रयोगशाळेत पाठवण्यात आले असता रसायन घातक असल्याचे उघडकीस आले होते.
तारापूर औद्योगिक वसाहतीमधील एका कारखान्यातून घातक रसायनाने भरलेला संशयास्पद टँकर (एम.एच.04, डी. एस.9628) रसायनाची बेकायदा विल्हेवाट लावण्यासाठी पाम गावाकडे जात असताना गोगटे नाका येथे बोईसर पोलिसांनी ताब्यात घेतला. पोलिसांनी टँकरमधील रसायनासंबंधित कागदपत्रांची मागणी केली असता चालकाकडे आवश्यक कागदपत्रे आढळून आली नव्हती. याप्रकरणी प्रदूषण नियंत्रण मंडळाच्या अधिकाऱ्यांना माहिती दिल्यानंतर क्षेत्र अधिकारी यांनी टँकरमधील रसायनाचे नमुने ताब्यात घेऊन तपासणीसाठी ठाणे येथील प्रदूषण नियंत्रण मंडळाच्या प्रयोगशाळेत पाठवले होते. रसायनाची वाहतूक करणारा टँकर हा अष्टविनायक एण्टरप्राइजेस या कंपनीचा आहे.
प्रदूषण नियंत्रण मंडळाच्या नियमांचा भंग
प्रदूषण नियंत्रण मंडळाच्या अटी-शर्तीनुसार टँकरमधून घातक रसायनाची वाहतूक करण्याआधी टँकर मालकाने मॅनीफेस्ट (फॉर्म 10) च्या ऑनलाइन प्रती सादर केल्या नव्हत्या. त्याचप्रमाणे टँकरमधील रसायनाचे नमुने प्रयोगशाळेत तपासले असता हे रसायन घातक असल्याचे उघडकीस आले. घातक रसायनाची विनापरवाना वाहतूक केल्याप्रकरणी टँकरचालक शिवम दुबे, विवेक वडे आणि नील राऊळ यांच्याविरोधात बोईसर पोलीस ठाण्यात गुन्हा दाखल करण्यात आला आहे. याप्रकरणी पुढील तपास हा सहाय्यक पोलीस निरीक्षक सतीश अस्वार करीत आहेत.
