तुम्ही दिल्लीच्या सहलीची योजना आखत असाल आणि तुमच्या यादीत लाल किल्ला असेल तर, ही बातमी तुमच्यासाठी आहे. 2026 च्या स्वातंत्र्य दिनाच्या तयारीमुळे ऐतिहासिक लाल किल्ल्यातील प्रवेश सर्वसामान्य पर्यटकांसाठी एका महिन्याकरिता बंद करण्यात आला आहे. भारतीय पुरातत्व सर्वेक्षण (ASI) ने या संदर्भात एक आदेश जारी केला आहे. त्यामुळे जे 15 जुलै ते 15 ऑगस्ट 2026 दरम्यान लाल किल्ल्याला भेट देण्याची योजना आखत आहेत, त्यांना त्यांच्या प्रवासाचे नियोजन बदलावे लागेल.
पुरातत्व सर्वेक्षण विभागाच्या (ASI) आदेशानुसार, 15 जुलै 2026 ते 15 ऑगस्ट 2026 या कालावधीत लाल किल्ल्यात सार्वजनिक प्रवेशास सक्त मनाई असेल. या कालावधीत ज्या पर्यटकांनी ऑनलाइन किंवा ऑफलाइन तिकीट बुक केले आहे, त्यांना या संकुलात प्रवेश दिला जाणार नाही. त्यामुळे दिल्लीत भेट देण्यापूर्वी, कृपया आपल्या प्रवासाच्या तारखा आणि पर्यटन स्थळांची यादी तपासा. भारतीय पुरातत्व सर्वेक्षण विभागाने आपल्या आदेशात म्हटले आहे की, हा निर्णय ‘प्राचीन स्मारके आणि पुरातत्व स्थळे व अवशेष नियम, 1959’ च्या नियम 5 अंतर्गत घेण्यात आला आहे. स्वातंत्र्यदिनाच्या सोहळ्याची सुरक्षित आणि सुव्यवस्थित तयारी सुनिश्चित करण्यासाठी दरवर्षी लाल किल्ला एका विशिष्ट कालावधीसाठी लोकांसाठी बंद ठेवला जातो.
दरवर्षी 15 ऑगस्ट रोजी पंतप्रधान लाल किल्ल्यावरून देशाला संबोधित करतात. हा देशातील सर्वात मोठा राष्ट्रीय सोहळा आहे. या कार्यक्रमाच्या तयारीसाठी मंचाची उभारणी, सुरक्षा उपकरणांची स्थापना, रंगीत तालीम, सुरक्षा यंत्रणांची तैनात आणि इतर व्यवस्थांसाठी संपूर्ण लाल किल्ला परिसर सुरक्षा दलांच्या नियंत्रणाखाली ठेवला जातो. त्यामुळे या काळात पर्यटकांच्या प्रवेशास मनाई असते. स्वातंत्र्य दिनाचे सोहळे संपल्यानंतर लाल किल्ल्यातील सार्वजनिक प्रवेश पूर्ववत केला जाईल. जर तुम्ही या ऐतिहासिक वास्तूला भेट देण्याची योजना आखत असाल तर, 15 ऑगस्टनंतरची तारीख निवडणे उत्तम राहील. यामुळे कोणत्याही त्रासाशिवाय लाल किल्ल्याला भेट देता येईल.
स्वातंत्र्य दिनाच्या पार्श्वभूमीवर, केवळ लाल किल्ल्यावरच नव्हे तर संपूर्ण आजूबाजूच्या परिसरात कडक सुरक्षा व्यवस्था असेल. अनेक ठिकाणी बॅरिकेडिंग, अतिरिक्त सुरक्षा तपासणी आणि तात्पुरते वाहतूक निर्बंध लागू केले जाऊ शकतात. त्यामुळे दिल्लीला भेट देणाऱ्या पर्यटकांना आणि सर्वसामान्य नागरिकांना कोणताही त्रास टाळण्यासाठी प्रवासापूर्वी प्रशासन आणि वाहतूक पोलिसांनी जारी केलेल्या नवीनतम सूचना पाहण्याचा सल्ला देण्यात येत आहे.
