आपल्या आजूबाजूला असं कुणीच नसेल की, ज्याला बिर्याणी आवडत नाही. बिर्याणी हा असा पदार्थ आहे की, नाव ऐकताच सर्वांच्या तोंडला पाणी सुटते. व्हेज असो किंवा नाॅनव्हेज बिर्याणीची मज्जा काहीतरी वेगळी असते. तर आज आपण जाणून घेऊ परफेक्ट अंड्याची बिर्याणी रेसिपी
साहित्य
4-6 अंडी
200 ग्रॅम तांदूळ
खडा मसाला ( 3 लवंग, 2 काळी मिरी, मोठी इलायची, हिरवी इलायची, चक्रफुल , तमालपत्र )
1 मोठा बारीक कापलेला कांदा
1 बारीक कापलेले टोमॅटो
1 बटाटा बारीक चौकोनी कापलेला
अर्धी बारीक कापलेली भोपळी मिरची
1 बारीक कापलेली हिरवी मिरची
1 चमचा गरम मसाला
5 ते 6 चमचे दही
अर्धा चमचा आलं लसणाची पेस्ट
अर्धा चमचा जिरे पावडर
1 चमचा हळद
अर्धा चमचा लाल मिरची पावडर
अर्धा चमचा धने पावडर
1 चमचा बिर्याणी मसाला
2 चमचे तूप
कोथिंबीर आणि पुदीना
चवीपुरते मीठ
सर्वप्रथम तांदूळ नीट धुवून घ्या. थोडा वेळ भिजत ठेवावा जेणे करून तांदूळ थोडा फुलेल. त्यानंतर हा तांदूळ नंतर 70% शिजवून घ्या.
तांदूळ शिजवताना सर्वप्रथम तेलात जिरं, खडा मसाला, कोथिंबीर, लिंबाचा रस घाला आणि तांदूळ घाला आणि अधिकचे पाणी घालून शिजवून घ्या.
तांदुळ शिजेपर्यंत दुसऱ्या बाजूला अंडी उकडून घ्या, अंडी उकडलेल्या अंड्यांच्या पांढऱ्या भागावर चिरा मारुन घ्या.
त्यानंतर एका पॅनमध्ये थोडं तेल, हळद, आणि लाल तिखट घालून अंडी सोनेरी होईपर्यंत परतवून घ्या.
नंतर एका भांड्यात तेल टाकून ते गरम करा, त्यात कापलेला कांदा आणि मिरची टाकून त्याचा रंग तपकिरी होईपर्यंत परतवून घ्या यानंतर त्यात कापलेले टोमॅटो, शिमला मिरची आणि बटाटा टाका.
आता या मिश्रणाला मध्यम आचेवर आणखी 2-3 मिनिट शिजवून घ्या
नंतर यामध्ये लाल तिखट, हळद, धने पावडर, आलं लसणाची पेस्ट, गरम मसाला, 2-3 हिरवी मिरची, पुदिना, कोथिंबिर, 4-5 चमचे फेटलेलं दही आणि मीठ घालून चांगले परतवून घ्या.
मिश्रणात अंडी घालून मिश्रण चांगलं परतवून घ्या नंतर त्यामध्ये शिजवलेला तांदूळ घाला आणि त्यानंतर पुरेसं पाणी कोथिंबिर, साजूक तूप घालून तांदूळ पुर्ण शिजवून घ्या. नंतर गरमागरम बिर्याणी थंडगार कोशिंबीर सोबत सर्व्ह करा.
