संगमनेर शहराच्या मध्यवस्तीत असणा ऱ्या शिवाजीनगर येथे छापा टाकून नगर गुन्हे शाखा आणि संगमनेर शहर पोलिसांच्या पथकाने गांजा आणि गर्द (हेरॉईन) विक्री करणाऱ्या एकाला अटक केली आहे. नुकतीच पुणे पोलिसांनी संगमनेरमध्ये कारवाई करीत बनावट ताडी तयार करण्याचे लाखो रुपयांचे केमिकल पकडले होते. त्यानंतर लगेचच अमली पदार्थांची ही दुसरी कारवाई संगमनेरमध्ये झाली आहे. सातत्याने होणा ऱ्या कारवायांमुळे नगर जिह्यात अवैध धंद्यांचे प्रमुख केंद्र संगमनेर झाल्याचे दिसून येत आहे. अंबादास शांताराम शिंदे (रा. जैन सर्कल, शिवाजीनगर, ता. संगमनेर) असे अटक केलेल्या आरोपीचे नाव आहे. त्याच्याकडून 5 लाख 17 हजार 180 रुपयांचा मुद्देमाल जप्त केला आहे. या छाप्यामध्ये पोलिसांनी 4 किलो 498 ग्रॅम गांजा आणि 36 ग्रॅम गर्द (हेरॉईन) जप्त केले आहे.
संगमनेर शहराच्या मध्यवस्तीत राहणारा अंबादास शिंदे अमली पदार्थ विक्री करीत असल्याची माहिती गुन्हे शाखेच्या पथकाला मिळाली होती. त्यांनी संगमनेर शहर पोलिसांशी संपर्क करून शहर आणि गुन्हे शाखेच्या संयुक्त पथकाने ही कारवाई केली. संशयिताच्या घराची झडती घेतली असता एका गोणीत गांजा बिया, बोंडे, काडय़ा, पाने संलग्न असलेला पाला मिळून आला. तसेच त्याच्या पॅन्टच्या खिशात प्लॅस्टिक पिशवीत विटकरी रंगाची पावडर (गर्द) मिळून आली. आरोपी शिंदे विरुद्ध संगमनेर शहर पोलिसांनी गुन्हा दाखल केला आहे.
सर्व अवैध धंद्यांचे केंद्र संगमनेर
संगमनेर शहर आणि तालुक्यात सर्व प्रकारचे अवैध धंदे सुरू असल्याचे वारंवार उघड होत आहे. अमली पदार्थ गांजा, गर्द याचबरोबर केमिकलद्वारे बनावट ताडी बनवणे, हे तर उघड झाले आहेच. परंतु, शहर आणि ग्रामीण भागात वाळू तस्करी, कत्तलखाने, गोवंश हत्या, गुटखा विक्री, मटका, जुगार असे अनेक प्रकारचे अवैध धंदे सुरू असल्याचे आढळून आले आहे. संपूर्ण नगर जिह्यात संगमनेर तालुका अवैध धंद्यांचे केंद्र बनला असल्याची चर्चा आहे.
