IndvsEng – घरच्या मैदानावर टीम इंडियाचे गोलंदाज ‘फ्लॉप’, पाहुण्यांची जबरदस्त फलंदाजी

बातमी शेअर करा :
सामना फॉलो करा

टीम इंडिया व इंग्लंडमध्ये चेन्नईच्या मैदानावर आजपासून सुरू झालेल्या पहिल्या कसोटी सामन्याचा पहिला दिवस पाहुण्या संघाच्या नावावर राहिला. इंग्लंडच्या फलंदाजांनी जबरदस्त फलंदाजी करत पहिला दिवस गाजवला. त्यात ऑस्ट्रेलियात मालिका गाजवणाऱ्या टीम इंडियाच्या गोलंदाजांनी घरच्या मैदानावर अत्यंत खराब प्रदर्शन केले. तर इंग्लंडचा कर्णधार जो रुटने शतक ठोकत आपल्या संघाला चांगली धावसंख्या मिळवून दिली.

कोरोनामुळे हिंदुस्थानात गेल्या वर्षभरापासून एकही मालिका खेळली गेलेली नाही. या नव्या मोसमातील ही पहिली मालिका आहे. चार सामन्यांच्या या मालिकेला शुक्रवारपासून सुरू झाली. नाणेफेक जिंकत इंग्लंडने फंलदाजी करण्याचा निर्णय घेतला. सलामीवीर रॉरी बर्न्स आणि डॉम सिबली हे अश्वीनच्या जबरदस्त माऱ्यासमोर डगमगत होते. त्यातच रॉरी बर्न्स झेलबाद झाला. त्याने 60 चेंडूत 33 धावा केल्या. त्यानंतर आलेला डॅन लॉरेन्स शून्य धावांवर बाद झाला. त्यानंतर मात्र आलेल्या कर्णधार जो रुटने शतक ठोकत संघाला मजबूत स्थितीत आणले.

पहिल्या दिवसाअखेर इंग्लंडने तीन खेळाडूंच्या मोबदल्यात 263 धावा केल्या. कर्णधार जो रुट हा 128 धावांवर नाबाद आहे. तर पहिल्या दिवसाचा खेळ संपत असताना डॉमिनिक सिबलेला बुमराहने 87 धावांवर बाद केले.