अंडी हा प्रथिनांचा उत्कृष्ट स्रोत मानला जातो. म्हणूनच अनेकजण नाश्त्यासाठी किंवा घाईच्या वेळी उकडलेली अंडी खाणे पसंत करतात. मात्र, उकडलेली अंडी पुन्हा गरम करून खाणे सुरक्षित आहे का, असा प्रश्न अनेकांच्या मनात असतो. आरोग्य तज्ज्ञांच्या मते, योग्य पद्धतीने साठवणूक आणि गरम केल्यास उकडलेली अंडी पुन्हा खाणे सुरक्षित ठरू शकते. तज्ज्ञांच्या मते, उकडलेली अंडी शिजवल्यानंतर दोन तासांच्या आत फ्रिजमध्ये ठेवणे आवश्यक आहे. योग्य तापमानात साठवलेली अंडी पुन्हा गरम करताना त्यांचे अंतर्गत तापमान किमान 74 अंश सेल्सिअसपर्यंत पोहोचणे गरजेचे आहे. यामुळे साल्मोनेलासारख्या हानिकारक जीवाणूंचा धोका कमी होतो.
मात्र, अंडी बराच वेळ खोलीच्या तापमानावर ठेवली असतील तर ती पुन्हा गरम करून खाणे टाळावे. अशा अंड्यांमध्ये जीवाणू वाढण्याची शक्यता अधिक असते, ज्यामुळे अन्नविषबाधेचा धोका निर्माण होऊ शकतो. तज्ज्ञ मायक्रोवेव्हमध्ये उकडलेली अंडी गरम न करण्याचा सल्ला देतात. मायक्रोवेव्हमधील उष्णतेमुळे अंड्याच्या आत वाफेचा दाब वाढतो. त्यामुळे अंडे अचानक फुटू शकते आणि भाजण्याचा धोका निर्माण होऊ शकतो.
उकडलेली अंडी पुन्हा गरम करण्यासाठी उकळत्या पाण्याचा वापर हा सर्वात सुरक्षित पर्याय मानला जातो. एका भांड्यात पाणी उकळून गॅस बंद करा. त्यानंतर कवचासह उकडलेली अंडी गरम पाण्यात टाका आणि सुमारे 10 मिनिटे झाकून ठेवा. या पद्धतीमुळे अंडी समान प्रमाणात गरम होतात, त्यांचा पोत खराब होत नाही आणि फुटण्याचाही धोका राहत नाही.
अशा प्रकारे योग्य काळजी घेतल्यास उकडलेली अंडी पुन्हा गरम करून सुरक्षितपणे खाता येऊ शकतात.
