अमेरिकेतील सिएटल शहरात पोलीस कारच्या धडकेत मृत्यू पावलेली २३ वर्षीय हिंदुस्थानी विद्यार्थिनी जान्हवी कंडुला हिच्या कुटुंबाला अखेर न्याय मिळाला आहे. सिएटल प्रशासनाने जान्हवीच्या कुटुंबासोबत २९ दशलक्ष डॉलर्स (सुमारे २६२ कोटी रुपये) इतक्या विक्रमी रकमेचा समझोता (Settlement) केला आहे. २०२३ मध्ये रस्ता ओलांडताना वेगवान पोलीस वाहनाने जान्हवीला चिरडले होते.
जान्हवी कंडुला ही सिएटलमधील ईशान्य विद्यापीठात (Northeastern University) पदव्युत्तर शिक्षण घेत होती. २०२३ मध्ये रस्ता ओलांडत असताना अधिकारी केविन डेव्ह याच्या भरधाव पोलीस कारने तिला धडक दिली. ज्या ठिकाणी वाहनांचा वेग ताशी ४० किमी असणे आवश्यक होते, तिथे पोलीस अधिकारी ११९ किमी प्रतितास वेगाने गाडी चालवत होता. या भीषण अपघातात जान्हवीचा जागीच मृत्यू झाला होता.
जान्हवीच्या मृत्यूनंतर सिएटल पोलीस दलातील दुसऱ्या एका अधिकाऱ्याचा, डॅनियल ऑडररचा बॉडी कॅमेरा व्हिडिओ समोर आल्यावर जगभरात संताप व्यक्त झाला होता. या व्हिडिओमध्ये तो हसत जान्हवीच्या आयुष्याला ‘मर्यादित मूल्य’ असल्याचे म्हणत होता आणि ‘फक्त एक चेक लिहून देऊन विषय संपवा’, असे वक्तव्य करताना दिसला होता. हिंदुस्थानने या प्रकरणाच्या सखोल तपासाची मागणी केली होती. यानंतर संबंधित अधिकाऱ्याला सेवेतून बडतर्फ करण्यात आले होते.
‘जान्हवी कंडुलाचा मृत्यू हृदयद्रावक होता आणि या आर्थिक समझोत्यामुळे कंडुला कुटुंबाला काही अंशी दिलासा मिळेल अशी शहर प्रशासनाला आशा आहे’, असे सिएटलच्या सिटी अॅटर्नी एरिका इव्हान्स यांनी एका निवेदनात म्हटले आहे. ‘जान्हवीचे आयुष्य महत्त्वाचे होते. तिच्या कुटुंबासाठी, मित्रांसाठी आणि समाजासाठी ती मौल्यवान होती’, अशा भावनाही त्यांनी व्यक्त केल्या.
या समझोत्यातील सुमारे २० दशलक्ष डॉलर्सची रक्कम विमा कंपनीमार्फत दिली जाणार असल्याचे कळते.
