जम्मू कश्मीरमध्ये दहशतवाद्यांसोबत चकमकीत एक जवान शहीद, 9 दहशतवाद्यांचा खात्मा

1136
फाईल फोटो

जम्मू कश्मीरमधील केरन सेक्टरमधील प्रत्यक्ष नियंत्रण रेषेवर दहशतवाद्यांसोबत शनिवारपासून सुरू असलेल्या चकमकीत एक जवान शहीद झाले आहेत. या चकमकीत दोन जवान गंभीर जखमी झाले आहेत. गेल्या 24 तासांपासून सुरू असलेल्या या चकमकीत 9 दहशतवाद्यांना कंठस्नान घालण्यात जवानांना यश आले आहे.

कुलगाम जिल्ह्यातील हर्दमनगुरी बटपोरा येथे दहशतवादी लपून बसल्याची माहिती मिळाली. यानंतर स्थानिक पोलीस, स्पेशल ऑपरेशन ग्रुप आणि लष्कराच्या राष्ट्रीय रायफल दलाने या भागात संयुक्तपणे शोधमोहीम सुरू केली. परिसराला घेराव घातल्यानंतर दहशतवाद्यांनी जवानांवर गोळीबार सुरू केला. जवानांनी देखील जोरदार प्रत्युत्तर दिले. या चकमकीत 4 दहशतवाद्यांना कंठस्नान घालण्यात आले. हे सर्व दहशतवादी हिजबुल मुजाहिद्दीनशी संबंधित होते. त्यानंतर शनिवारी रात्रभर झालेल्या चकमकीत आणखी पाच दहशतवाद्यांचा खात्मा करण्यात आला.

याआधी 15 मार्चला अनंतनाग जिल्ह्यात सुरक्षा जवानांनी
लश्कर-ए-तोएबाच्या 4 दहशतवाद्यांना यमसदनी धाडले होते. वटरीग्राम गावातील एका घरात हे दहशतवादी लपून बसले होते. सुरक्षा जवानांनी त्यांना पकडण्याचा प्रयत्न केला असता त्यांनी गोळीबार केला. यावेळी उडालेल्या धुमश्चक्रीत दहशतवादी ठार झाले. तसेच याच दिवशी सोपेर जिल्ह्यात जैश-ए-मोहम्मदच्या एका दहशतवाद्याला अटक करण्यात आली होती. त्याच्याकडून पिस्तुल, जिवंत काडतुसे आणि हत्यारांचा साठा जप्त करण्यात आला होता.

आपली प्रतिक्रिया द्या