इडुक्की भूस्खलन – मृतांचा आकडा 43 वर, 6 महिन्यांच्या चिमुकल्याचा मृतदेह सापडला

526

केरळमध्ये शुक्रवारी इडुक्की जिल्ह्यात राजमाला येथे भूस्खलन होऊन चहाच्या मळ्यात काम करणाऱ्या मजुरांची वसाहतच वाहून गेली. यात 43 मजुरांचा मृत्यू झाला असून 10 जणांना वाचवण्यात यश आले आहे. मलब्याखाली आणखी काही जण दबल्याचा संशय आहे. दुर्घटनेत मरण पावलेले सर्व मजूर तामिळनाडूचे आहेत.

रविवारी भूस्खलन झालेल्या ठिकाणावरून मलब्याखाली दबलेले आणखी 17 मृतदेह बाहेर काढण्यात आले. यात एका सहा महिन्यांच्या चिमुकल्याचाही समावेश आहे. यामुळे आता मृतांची संख्या 43 झाली आहे. मलब्याखाली आणखी काही जण दबले असून त्यांना बाहेर काढण्याचा काम युद्धपातळीवर सुरू आहे.

इडुक्की जिल्ह्यात पावसाने धुमाकूळ घातला आहे. चार दिवसांपासून होत असलेल्या मुसळधार पावसामुळे संपूर्ण जिल्हा जलमय झाला आहे. राजमाला येथे डोंगरपायथ्याशी चहाच्या मळ्यात काम करणाऱ्या मजुरांची वसाहत आहे. या ठिकाणी एकुण 78 मजूर राहत होते. हे सर्व मजूर तामिळनाडूमधील आहेत.

पाच जिल्ह्यांत अतिवृष्टीचा इशारा
दरम्यान, हवामान खात्याने मलप्पुरम, एर्नाकुलम, त्रिशूर, वायनाड आणि इडुक्की या पाच जिल्ह्यांना पावसाचा तडाखा बसणार असल्याचा इशारा दिला. अगोदरच चार दिवसांपासून होत असलेल्या संततधार पावसामुळे चालियार, पेरियार, मुथिरापुझा या नद्या धोक्याच्या पातळीवरून वाहत आहेत. महापुराचे पाणी अनेक गावांत घुसले आहे.

मदतीची घोषणा
इडुक्की दुर्घटनेवर पंतप्रधान नरेंद्र मोदी यांनी दुःख व्यक्त केले आहे. पीएमओ कार्यालयाने यातील मृतांचा नातेवाईकांना प्रत्येक 2 लाख रुपये आणि जखमींना 50 हजार रुपयांची मदत देण्याची घोषणा केली आहे.

आपली प्रतिक्रिया द्या