मुंबईतील प्रसिद्ध आर्थर रोड मध्यवर्ती कारागृहातून एक धक्कादायक घटना समोर आली आहे. कारागृहातील एका कैद्याने पोलीस कर्मचाऱ्यावर जीवघेणा हल्ला केल्यामुळे परिसरात मोठी खळबळ उडाली आहे. या हिंसक घटनेत पोलीस शिपाई वाघ हे जखमी झाले असून त्यांच्यावर उपचार सुरू असल्याची माहिती मिळत आहे. लोकेंद्र उदयसिंग रावत असे हल्ला करणाऱ्या आरोपीचे नाव आहे.
मिळालेल्या माहितीनुसार, ही घटना कारागृहाच्या मुख्य प्रवेशद्वाराजवळील मोकळ्या जागेत घडली. आरोपी लोकेंद्र रावत हा अचानक तेथे तैनात असलेल्या पोलिसांच्या दिशेने बघून अर्वाच्य भाषेत शिवीगाळ करू लागला. परिस्थितीचे गांभीर्य ओळखून पोलीस शिपाई वाघ आणि त्यांच्या सहकाऱ्यांनी रावतला शांत करण्याचा व त्याला समजावण्याचा प्रयत्न केला. मात्र, संतापलेल्या रावतने पोलिसांचे ऐकण्याऐवजी अधिकच आक्रमक पवित्रा घेतला आणि थेट शिपाई वाघ यांच्यावर प्राणघातक हल्ला चढवला.
यावेळी तिथे उपस्थित असलेल्या इतर पोलीस कर्मचाऱ्यांनी मध्यस्थी करून वाद सोडवण्याचा प्रयत्न केला असता, आरोपीने त्यांनाही धक्काबुक्की केली आणि सरकारी कामात अडथळा निर्माण केला. या अनपेक्षित हल्ल्यामुळे कारागृह प्रशासनात एकच धावपळ उडाली. या गंभीर प्रकारानंतर आरोपी लोकेंद्र रावत विरुद्ध संबंधित पोलीस ठाण्यात विविध कलमान्वये गुन्हा दाखल करण्यात आला आहे. कारागृहासारख्या सुरक्षित ठिकाणी पोलिसांवरच हल्ला झाल्याने कैद्यांच्या सुरक्षेचा आणि शिस्तीचा प्रश्न पुन्हा एकदा ऐरणीवर आला आहे. पोलीस या प्रकरणाचा अधिक तपास करत आहेत.
