अजित पवार गटाचे पदाधिकारी राजेंद्र हगवणे आणि त्यांच्या कुटुंबीयांच्या त्रासाला कंटाळून त्यांची सून वैष्णवी हगवणेने टोकाचे पाऊल उचलले. दोन कोटींच्या हुंड्यासाठी मानसिक, शारीरिक छळ केल्यामुळे वैष्णवीने शुक्रवारी गळफास घेऊन आत्महत्या केली होती. या प्रकरणी वैष्णवीचा पती, सासू आणि नणंद यांना अटक करण्यात आली आहे. मात्र वैष्णवीचे सासरे राजेंद्र हगवणे आणि तिचा दीर अद्यापही फरार आहे. या घटनेमुळे संपूर्ण देशभरातून संताप व्यक्त केला जात आहे. तसेच राजेंद्र हगवणे यांना गटातून काढून टाकण्याची मागणी केली जात होती. यामुळे आता अजित पवार गटानेही कारवाई करत राजेंद्र हगवणे यांची हकालपट्टी केली आहे.
राज्याचे उपमुख्यमंत्री अजित पवार यांनी वैष्णवी हगवणे आत्महत्या प्रकरणात दोषींवर कडक कारवाई करण्याचे निर्देश दिलेले आहेत. याच सोबत राजेंद्र हगवणे यांना अजित पवार गटातून बडतर्फ करण्यात आले आहे. याबाबत राष्ट्रवादी काँग्रेस अजित पवार गटाचे युवक प्रदेशाध्यक्ष, सुरज चव्हाण यांनी माहिती दिली आहे. अजित पवार यांचं पुणे पोलीस आयुक्तांसोबत बोलणं झालं आहे. आणि अजित पवारांनी सुद्धा कारवाईचे निर्देश दिले आहेत. त्यामुळे राजेंद्र हगवणे यांना पक्षातून बडतर्फ करण्यात आलं आहे, असे ते यावेळी म्हणाले.
राजेंद्र हगवणे यांचा राष्ट्रवादी काँग्रेस पक्षाशी कोणताही संबध नाही. त्यांची आता पक्षातून हकालपट्टी करण्यात आली आहे. राज्याचे उपमुख्यमंत्र्यांनी यापूर्वीही अनेकदा कार्यकर्त्यांना संदेश दिला आहे. माझा कोणताही कार्यकर्ता चुकीचा वागला तर त्याला टायरमध्ये घेऊन मारावा अशा पद्धतीच्या सूचना त्यांनी वारंवार दिल्या आहेत. त्याचप्रमाणे हगवणे प्रकरणांमध्ये सुद्धा अजितदादांनी पुणे सीपींशी बोलून तात्काळ त्यांच्यावरती कारवाई करण्यात यावी असे आदेश दिले आहेत, असे सुरज चव्हाण म्हणाले आहेत. याचसोबत त्यांनी माध्यमांनी या प्रकरणाला पक्षीय स्वरूप न देता याला न्यायाच्या भूमिकेतून पहावं असे आवाहन केले आहे. राजेंद्र हगवणे आणि त्यांच्या कुटुंबीयांवरती कडक कारवाई व्हावी हीच राष्ट्रवादी काँग्रेसची भूमिका असल्याचे त्यांनी सांगितले आहे.
