सहकार चळवळ मोडून काढणे कोणालाही शक्य नाही! मुख्यमंत्री उद्धव ठाकरे यांचे प्रतिपादन

संपूर्ण देशाला सहकाराचा मार्ग दाखवणाऱया महाराष्ट्रातील सहकार चळवळीला अडचणीत आणण्याचा प्रयत्न केला जात असला तरी, राजर्षि शाहू महाराजांच्या विचारांचा वारसा घेऊन महाराष्ट्रात रुजलेली सर्वसामान्य माणसाच्या हिताची ही चळवळ मोडून काढणे कुणालाही शक्य होणार नाही, असे सांगतानाच एकविसाव्या शतकातील सहकार क्षेत्रासमोरील आव्हाने समजून घ्या. या क्षेत्रातील उणिवा आणि दोष दूर करण्यासाठी सहकार परिषदेच्या आयोजनातून विचारमंथन घडवून आणा, असे आवाहन मुख्यमंत्री उद्धव ठाकरे यांनी आज केले.

सहकारतपस्वी, माजी खासदार दिवंगत गुलाबराव पाटील यांच्या जनशताब्दीच्या ‘प्रेरणोत्सव’ कार्यक्रमात मुख्यमंत्री उद्धव ठाकरे बोलत होते. ते म्हणाले, आपण बोलून दमून जावे एवढे भव्य काम एखादी व्यक्ती आयुष्यात करू शकते हे दिवंगत गुलाबराव पाटील यांच्या कामातून दिसून येते. त्यांनी आयुष्य कमी पडेल एवढे भले मोठे काम सहकारात करून दाखवले. या कार्यक्रमास विधान परिषदेचे सभापती रामराजे नाईक -निंबाळकर, विधानसभा उपाध्यक्ष नरहरी झिरवळ, विधान परिषदेतील विरोधी पक्षनेते प्रवीण दरेकर, जन्मशताब्दी सोहळा समितीचे कार्याध्यक्ष तथा महसूल मंत्री बाळासाहेब थोरात, स्वागताध्यक्ष तथा जलसंपदा मंत्री जयंत पाटील आदी मान्यवर उपस्थित होते.

सहकाराच्या पाठीशी

सहकार हे असे क्षेत्र आहे ज्यातून सर्वसामान्य माणसाच्या आयुष्यात समृद्धी आणता येते. सहकारात देखील बदल घडण्याची गरज असून सर्वसामान्यांच्या हिताचे रक्षण करणाऱया सहकार चळवळीच्या बळकटीकरणासाठी सरकार नक्कीच खंबीरपणे सहकार क्षेत्राच्या पाठीशी उभे राहील, अशी ग्वाही उद्धव ठाकरे यांनी दिली. यावेळी मुख्यमंत्री उद्धव ठाकरे, विधान परिषद सभापती रामराजे निंबाळकर यांच्या हस्ते गुलाबराव पाटील यांच्या जीवनकार्यावरील चित्रफितीचे अनावरण झाले.

आपली प्रतिक्रिया द्या