हिंदुस्थानने ‘ऑपरेशन सिंदूर’चा तडाखा दिल्यानंतर बिथरलेल्या पाकिस्तानने शस्त्रसंधीसाठी विनंती केली. त्यानंतरच दोन्ही देशांमध्ये शस्त्रसंधीचा करार झाला. यात अमेरिकेची कुठल्याही प्रकारची मध्यस्थी नव्हती, अशी माहिती हिंदुस्थानी लष्कराकडून जारी करण्यात आलेल्या बुकलेटमध्ये देण्यात आली आहे. वॉर रूममध्ये तिन्ही सैन्यदलांचे प्रमुख उपस्थित होते. तेथून ते हिंदुस्थानी लष्कराकडून पीओके आणि पाकिस्तानातील दहशतवादी तळांना लक्ष्य करण्याच्या ऑपरेशनवर बारीक नजर ठेवून होते. या कारवाईचे मॉनिटरिंग करत होते, असेही स्पष्ट करण्यात आले आहे.
बुकलेटमध्ये सांगण्यात आले आहे की, कशा पद्धतीने वॉर रूममधून संपूर्ण ऑपरेशन सिंदूरवर नजर ठेवण्यात येत होती. आर्मी चीफ जनरल उकेंद्र द्विवेदी, नौदलप्रमुख चीफ अॅडमिरल दिनेश के त्रिपाठी आणि हवाई दलाचे प्रमुख एअरचीफ मार्शल एपी सिंह तिथे उपस्थित होते. दुसरीकडे परराष्ट्र मंत्री एस जयशंकर यांनी संसदीय समन्वय समितीची बैठक घेतली. पीओके आणि पाकिस्तानातील दहशतवादी तळांवर हल्ला केल्यानंतरच याबद्दलची माहिती पाकिस्तानच्या डीजीएमओंना देण्यात आली, असे परराष्ट्र मंत्र्यांनी चर्चेदरम्यान सांगितले.
राजस्थानवर डागले 413 ड्रोन्स
पाकिस्तानने राजस्थानातील नागरी वस्त्यांवर तसेच हिंदुस्थानच्या लष्करी तळांवर तब्बल 413 ड्रोन्स डागल्याची माहिती हिंदुस्थानी लष्कराने दिली आहे. पाकिस्तानने बाडमेर, जैसलमेर, बिकानेर, श्रीगंगानगर जिह्यात एकूण 413 हल्ले केले. हे सर्व हल्ले परतवून लावण्यात आले. हिंदुस्थानच्या हवाई संरक्षण यंत्रणेने सर्व ड्रोन्स पाडल्याची माहिती लष्कराने दिली आहे. दरम्यान, राजस्थानच्या फलोदी हवाई तळासह अनेक संवेदनशील ठिकाणांनाही पाकिस्तानने लक्ष्य बनवले; परंतु हिंदुस्थानी लष्कराने अचूक टायमिंग साधत सर्व हल्ले निष्क्रिय केल्याचे सीमा सुरक्षा दलाच्या मुख्यालयाचे आयजी एमएल गर्ग यांनी सांगितले.
