पोलीस अधीक्षक नवनीत कांवत यांनी अवैध धंदे आणि गैरकारभारावर निर्बंध आणण्यासाठी शर्थीचे प्रयत्न केले असताना दुसरीकडे त्यांच्याच खात्यातील कर्मचारी कायदा आणि सुव्यवस्थेचे धिंडवडे काढत आहेत. अन्य कुठे नव्हे, तर थेट पोलीस अधीक्षक यांच्या निवासस्थानीच रविवारी रात्री 9 ते 9.30च्या दरम्यान एका कर्मचाऱयाला एसपींनीच गांजा पिताना रंगेहाथ पकडले.
बाळू बहिरवाळ असे त्या कर्मचाऱयाचे नाव आहे. सध्या पोलीस अधीक्षक यांच्या निवासस्थानाच्या डागडुजीचे काम सुरू असल्याने ते सध्या गेस्ट हाऊसमध्ये मुक्कामी आहेत. रविवारी रात्री 9 ते 9.30च्या दरम्यान ते आपल्या कुटुंबासह घराचे काम पाहण्यासाठी गेले होते. या वेळी बाळू बहिरवाळ हा दरवाजा लावून आत गांजा पीत होता. पोलीस अधीक्षकांनी स्वतः खूप वेळ दरवाजा ठोठावूनही दार उघडत नसल्याने त्यांना शंका आली. काही वेळानंतर बाळूने दरवाजा उघडला तेव्हा आत गांजाचा वास आला. दरम्यान, तत्काळ पोलीस अधीक्षक यांनी शिवाजी नगर पोलिसांना बोलावून बाळू बहिरवाळची जिल्हा रुग्णालयात तपासणी करण्याचे आदेश दिले. या वेळी बाळूने गांजाचे सेवन केल्याचे अहवालातून समोर आल्यानंतर त्याच्यावर शिवाजी नगर पोलीस ठाण्यात गुन्हा दाखल करण्यात आला.
