राजकारण्यांनी पोलिसांना दमदाटी करणे ही पद्धत सध्या रूढ झाली आहे. सत्ताधारी नेते सरकारी अधिकाऱयांशी धमकीवजा संभाषण करतात. हे चुकीचे आहे. सत्ताधाऱयांनी पोलीस, सरकारी अधिकाऱयांना धमकावण्याचा प्रयत्न करू नये, असे सडेतोड मत मुंबईचे माजी पोलीस आयुक्त तथा पंजाबचे माजी पोलीस महासंचालक ज्युलिओ रिबेरो यांनी व्यक्त केले.
राज्याचे माजी पोलीस महासंचालक डी. शिवानंदन यांच्या ‘ब्रह्मास्त्र अनलिशड’ या मुंबईतील संघटित गुन्हेगारी व पोलिसांच्या प्रभावी कारवाईची माहिती देणाऱया पुस्तकाचे प्रकाशन रिबेरो यांच्या हस्ते करण्यात आले. या सोहळय़ात रिबेरो बोलत होते. यावेळी पोलीस महासंचालक रश्मी शुक्ला, मुंबईचे पोलीस आयुक्त देवेन भारती, माजी पोलीस आयुक्त महेश नारायण सिंग, सतीश साहनी तसेच गुप्तचर विभागाचे माजी वरिष्ठ अधिकारी व्ही. बालचंद्रन उपस्थित होते.
अशा अधिकाऱ्यांच्या पाठीशी उभे राहायला हवे
तरुण महिला आयपीएस अधिकाऱयाने उपमुख्यमंत्र्यांचे धमकीवजा संभाषण मुद्रित करण्याची हुशारी दाखवली. अशा अधिकाऱयांच्या पाठीशी आपण उभे राहिले पाहिजे. केवळ हेच उपमुख्यमंत्री नव्हे तर इतर उपमुख्यमंत्री, मुख्यमंत्र्यांनी पोलीस, सरकारी अधिकाऱयांना धमकावण्याचा प्रयत्न करू नये. कायदे तुम्हीच तयार केले आहेत आणि त्या कायद्यांचे पालन करू नका असे तुम्हीच सांगत आहात, अशा शब्दांत रिबेरो यांनी सत्ताधाऱयांना सुनावले. आपण ठाणे पोलीस आयुक्त असताना दारूअड्डय़ांविरुद्ध मोहीम राबविली होती. त्यावेळी हस्तक्षेप करणाऱया आमदाराला दिलेल्या उत्तराचा किस्सा त्यांनी सांगितला.
शिवानंदन हे गुप्तचर विभागातून मुंबईत बदलून आले होते. त्यावेळी ते थेट आपल्या घरी आले आणि एके-56 रायफली जुहू तारा रोड येथील नाल्यात लपविण्यात आल्याची पक्की खबर असल्याचे सांगू लागले. आम्ही तेथे गेलो आणि मोठा शस्त्रसाठा सापडला. शिवानंदन धडाडीचे अधिकारी असून आपल्यावर मुंबई पोलीस आयुक्तपदाची जबाबदारी सोपवली, तेव्हा शिवानंदन यांच्या बदलीचा घाट घातला जात होता, परंतु आपण तो उधळून लावला, अशी आठवण माजी पोलीस आयुक्त महेश नारायण सिंग यांनी सांगितली. आपले हे पुस्तक म्हणजे मुंबई पोलिसांनी संघटित गुन्हेगारीविरोधात फत्ते केलेल्या मोहिमेचे वर्णन आहे. अनेक अधिकाऱयांमुळेच हे शक्य झाले, असे शिवानंदन यांनी पुस्तकामागील भूमिका स्पष्ट करताना नमूद केले.
