आजचा अग्रलेख : अर्थव्यवस्था! सरकारी इतमामात अंत्यसंस्कार

3627

लोकसभा सचिवालयाच्या अंतर्गतनॅशनल इन्फोर्मेटिक्स सेंटरआहे. या संस्थेने नोटाबंदीनंतरच्या भ्रष्टाचाराची पोलखोल केली आहे. सरकार अधिकारावर येताच एक एक घुसखोर पकडून बाहेर काढू या घोषणेप्रमाणेच भ्रष्टाचार निर्मूलनाच्या घोषणेचे काय झाले? विकासाचे स्वप्न कसे खोटे आहे ते परवा बिहारात दिसले. माजी मुख्यमंत्री जगन्नाथ मिश्र यांचे निधन झाले. सरकारी इतमामात त्यांच्यावर अंत्यसंस्कार झाले. 21 तोफांची सलामी देण्याचा रिवाज त्यात आहे. पण सलामीस वर केलेल्या पोलिसांच्या बंदुकांतून एकही गोळी सुटली नाही. 21 बंदुकांचाचापदाबून पोलिसांची बोटे सुजली. आमची अर्थव्यवस्था त्या फसलेल्या तोफांच्या सलामीसारखीच झाली आहे. सीतारमण यांनी तेच सांगितले आहे. देशाच्या अर्थव्यवस्थेचे शासकीय इतमामात अंत्यसंस्कार सुरू आहेत काय? ते लवकरच दिसेल.

नोटाबंदीनंतर देशातील भ्रष्टाचारात वाढ झाल्याची कबुली अर्थमंत्री निर्मला सीतारमण यांनी दिली आहे. अर्थमंत्र्यांनी अत्यंत धाडसाने सत्य सांगितले आहे. आजार लपवला तर उपचार करता येणार नाही. आजार लपवणारा रोगी शेवटी मरण पावतो. देशात दोन गोष्टींनी थैमान मांडले आहे. आर्थिक मंदी आणि त्यातून निर्माण झालेला भ्रष्टाचाराचा भस्मासुर. पुन्हा बेरोजगारी थैमान घालतेच आहे. मंदी आणि बेरोजगारीचे मूळ नोटाबंदीच्या निर्णयात आहे. नोटाबंदीत अनेकांचा काळा पैसा मोठ्या प्रमाणात पांढरा झाला हे मान्य केले पाहिजे, पण कोट्यवधी लोकांनी नोकऱ्या गमावल्या हेसुद्धा कटू सत्य आहेच. नोटाबंदी ज्यांच्या कारकीर्दीत झाली ते अर्थमंत्री अरुण जेटली दिल्लीच्या रुग्णालयात जीवन-मृत्यूशी संघर्ष करीत आहेत व एक आणखी माजी अर्थमंत्री चिदंबरम हे भ्रष्टाचाराच्या आरोपाखाली तुरुंगात गेले आहेत, पण सीतारमण सांगतात तो भ्रष्टाचार नोटाबंदीनंतरचा, म्हणजे गेल्या साडेतीन वर्षांतला आहे. हा भ्रष्टाचार नक्की कोणत्या प्रकारचा, कोणी केला, त्यांच्यावर काय कारवाई केली याचे दाखले अर्थमंत्र्यांनी दिले असते तर बरे झाले असते. मोदी पुन्हा जिंकले असले तरी देशाची आर्थिक स्थिती स्फोटक झाली आहे. पंतप्रधान मोदी हे भ्रष्टाचाराची ‘पै-पै’ वसूल करण्याची भाषा करतात तेव्हा गर्वाने छाती फुलून येते. पण चिदंबरम यांचे पाप मागच्या सरकारातले आहे व सीतारमण म्हणतात तो नोटाबंदीनंतरचा भ्रष्टाचार सध्याच्या राजवटीतला आहे. नव्या राजवटीत परदेशातला काळा पैसा स्वदेशात आला नाही. उलट बँका बुडवणारे

शंभरावर उद्योगपती

देशातून पळून गेले. त्यांना सी.बी.आय.ने रोखले नाही व ईडीनेही आडकाठी केली नाही. चिदंबरम यांच्याबाबतीत जे युद्ध सीबीआय व ईडी आज करीत आहे ते निरव मोदी, मल्ल्या किंवा इतरांच्या बाबतीत झाले नाही. ममता बॅनर्जी यांच्या सहकाऱ्यांनी ‘शारदा चिट फंड घोटाळा’ केला. हा भ्रष्टाचार आहेच. त्या भ्रष्टाचाराचे मुख्य सूत्रधार मुकुल राय हे मात्र मुक्त संचार करीत आहेत. चिदंबरम यांना बांबू लावला तसा इतर मंडळींनाही तो लावला तरच भ्रष्टाचारास बूच बसेल. जुन्यांचा भ्रष्टाचार चिदंबरम यांच्या रूपाने शिक्षा भोगणारच आहे, पण सीतारमण म्हणतात त्याप्रमाणे नोटाबंदीनंतर नक्की कुणाचे उखळ पांढरे झाले ते शोधण्यात सरकार कमी पडले. नोटाबंदीनंतर देशात चलनातील रोकड वाढली असून याचा थेट संबंध बेकायदेशीर कामांशी आहे. 4 नोव्हेंबर 2016 ला देशात 17,174 बिलियन रुपयांचे रोख सर्क्युलेशन होते. तेच आता 29 मार्च 2019 ला वाढून 21,137 बिलियनपर्यंत पोहोचले. म्हणजे चलनातील वाढलेली रोकड संशयास्पद आहे. कोणीतरी खात आहेत व खाणाऱ्यांना सरकारी पातळीवर पाठबळ मिळत आहे. पैशांचा काळाबाजार व भ्रष्टाचार हा सहमतीने होत असतो. लोकसभा सचिवालयाच्या अंतर्गत ‘नॅशनल इन्फोर्मेटिक्स सेंटर’ आहे. या संस्थेने नोटाबंदीनंतरच्या भ्रष्टाचाराची पोलखोल केली आहे. सरकार अधिकारावर येताच एक एक घुसखोर पकडून बाहेर काढू या घोषणेप्रमाणेच

भ्रष्टाचार निर्मूलनाच्या घोषणेचे

काय झाले? मोदी यांनी ‘नवा भारत’ म्हणजे ‘Modern India’ची घोषणा केली तो ‘भारत’ सगळ्यांची काळजी घेणारा असावा हे स्वप्न होते, पण नव्या भारतात गेल्या दोन वर्षांत दोन कोटींवर लोकांना नोकऱ्या गमवाव्या लागल्या. बेकारी वाढली. लोकांच्या घरांतील चुलीही विझल्या. मोठे उद्योग बंद पडले व ‘टपरी’ चालवून दोन घास खाणाऱ्यांचेही हाल झाले. अर्थव्यवस्थेला मारलेला हा लकवा नवा भारत कसा निर्माण करणार? सीतारमण यांनाही हाच प्रश्न पडला असावा. देशाची आर्थिक घडी विस्कटलेली राहिली तर कसे व्हायचे? यावर कुणी चिंतन आणि मंथन करायला तयार नाही. झारखंडसारख्या छोट्या राज्यात पंधरा हजार लहान-मोठे उद्योग बंद पडतात, तेव्हा किमान दहा-बारा लाख लोक बेकार होतात. हे बेकार मग मुंबईसारख्या शहरांकडे वळतात. मुंबईतही उद्योगांची मंदीच आहे. यातून संघर्ष वाढेल आणि वर्गकलह सुरू होईल. विकासाचे स्वप्न कसे खोटे आहे ते परवा बिहारात दिसले. माजी मुख्यमंत्री जगन्नाथ मिश्र यांचे निधन झाले. सरकारी इतमामात त्यांच्यावर अंत्यसंस्कार झाले. 21 तोफांची सलामी देण्याचा रिवाज त्यात आहे. पण सलामीस वर केलेल्या पोलिसांच्या बंदुकांतून एकही गोळी सुटली नाही. 21 बंदुकांचा ‘चाप’ दाबून पोलिसांची बोटे सुजली. आमची अर्थव्यवस्था त्या फसलेल्या तोफांच्या सलामीसारखीच झाली आहे. सीतारमण यांनी तेच सांगितले आहे. देशाच्या अर्थव्यवस्थेचे शासकीय इतमामात अंत्यसंस्कार सुरू आहेत काय? ते लवकरच दिसेल.

आपली प्रतिक्रिया द्या