शिवसेना नेते खासदार अरविंद सावंत यांनी भाजपवर निशाणा साधला आहे. महापालिकेने हैदराबादच्या मेगा इंजिनीअरिंग नवख्या कंपनीला 1 लाख 87 हजार कोटीचे कंत्राट दिले असून त्या कंपनीकडून 15 टक्के रक्कम ही निवडणूक रोख्यांच्या स्वरुपात भाजपला देण्यात आल्याचे समोर आले आहे. त्यावरून अरविंद सावं यांनी भाजपला फटकारले आहे.
गेल्या दोन वर्षांपासून महानगरपालिकेकडून हैदराबादच्या मेगा इंजिनीअरिंग आणि इंन्फ्रास्ट्रक्चटर या कंपनीला कंत्राट देण्यात येत आहे, याबाबत पत्रकाराने प्रश्न विचारल्यावर अरविंद सावंत यांनी भाजपला फटकारले. ” काल बऱ्यापैकी इंडिया आघाडीच्या सर्व मान्यवर नेत्यांनी याच्यावर झोड उडवली आहे. कोण मेगा इंजिनीअर कंपनी ? कोण हा रेड्डी ज्याची ही कंपनी आहे. अलिकडे पाच दहा वर्षात निर्माण झालेली. तिला ठाण्याचं आणि मुंबईचं दुहेरी बोगद्याचं काम दिलेलं आहे. या कंपन्यांवर ईडीने धाड टाकली होती. धाड टाकल्यानंतर धमकावून त्यांच्याकडून सगळं घेतलेलं आहे. माझ्याकडे मेगा इंजिनीअरिंगचे डिटेल्स आहेत. किती कामं तुम्ही त्यांना दिलेली आहेत. त्या मेगा इंजिनीअरिंगला 1 लाख 87 हजार कोटी एवढ्या रकमेचे काम दिले. यातील 15 टक्के रक्कम त्यांनी तुम्हाला रोख्यांमध्ये घेतली. या सर्व कंपन्यांवर धाड टाकली म्हणून निर्मला सितारामन यांना बिचाऱ्यांना सारवा सारव करावी लागली, असे अरविंद सावंत यांनी सांगितले.
भाजप आणि मिंधे गटावर निशाणा साधत ते पुढे म्हणाले, भ्रष्टाचार तर तुम्ही करता पण आता वैचारिक भ्रष्टाचारही झालेला आहे. तुमचं हे ढोंग आहे. तुम्ही हिंदुत्ववादी नाही आहात. तुम्हाला फक्त निवडणुकांआधी हिंदुत्ववाद हवा असतो आणि महत्त्वाचे म्हणजे तुम्हाला द्वेष पसरवायचा असतो. ते काम आम्ही करत नाही असे यावेळी म्हणाले. त्यानंतर जागावाटप नेमके कधी होणार यावर अरविंद सावंत म्हणाले, आज शिवसेना (उद्धव बाळासाहेब ठाकरे) पक्षप्रमुख उद्धव ठाकरे हिंगोलीला गेले आहेत. त्यांच्या आज आणि उद्या हिंगोली मतदारसंघात सभा आहेत. या सगळ्या विषयावर परवा तिन्ही पक्षाच्या नेत्यांनी सांगितले की, आमचा निर्णय झालेला आहे. सुदैवाने वंचित बहुजन आघाडीचे प्रकाश आंबेडकर यांनी कालच्या उपस्थिती लावली होती. त्यामुळे तोडगा निघालेला आहे. या 24 तासात होऊन जाईल.
