सर्वोच्च न्यायालयातील वकील सिद्धार्थ शिंदे यांचे सोमवारी रात्री दिल्लीतील एम्स रुग्णालयात निधन झाले. ते 48 वर्षांचे होते. शिंदे यांना सर्वोच्च न्यायालयात असतानाच चक्कर आली. त्यानंतर त्यांना एम्स रुग्णालयात हलवले. मात्र हृदयक्रिया बंद पडल्याने त्यांची प्राणज्योत मालवली. माजी केंद्रीय कृषिमंत्री अण्णासाहेब शिंदे यांचे ते नातू होत.
सिद्धार्थ शिंदे यांना महाराष्ट्रातील राजकीय परिस्थितीची उत्तम समज आणि सखोल संविधानिक ज्ञान होते. त्यांच्या पश्चात पत्नी, मुलगा, मुलगी असा परिवार आहे. मूळचे श्रीरामपूर येथील रहिवासी असलेले सिद्धार्थ शिंदे यांचे कुटुंबीय अनेक वर्षांपासून पुण्यामध्ये स्थायिक आहे. केसेस, निर्णय, न्यायाधीशांचा दृष्टीकोन व कायदेशीरता या सर्वांबाबत अत्यंत संयत व सोप्या पद्धतीने विश्लेषण करणारे संविधान विश्लेषक वकील आपण गमावला, अशी भावना ऍड. असीम सरोदे यांनी व्यक्त केली.
