महिलांवरील अत्याचाराची मालिका सुरूच आहे. कोलकाता, बदलापूर, पुणे,… यासारख्या अनेक शहरांमध्ये मुलींना वासनेचे शिकार बनवले जात आहे. त्यामुळे देशभरात संतापाची लाट उसळली आहे. अशातच आता तामिळनाडूमधून एक मोठी घटना समोर आली आहे. केंद्रीय विद्यालय शाळेतील एका शिक्षकाने इयत्ता आठवीतील विद्यार्थिनीवर लैंगिक अत्याचार केले आहेत. याप्रकरणी आरोपी शिक्षकाला अटक करण्यात आली आहे.
मिळालेल्या माहितीनुसार, रामचंद्र सोनी असे त्या आरोपीचे नाव आहे. सोनी हा शाळेत कला शिक्षक आहे. आरोपी रामचंद्र हा मुळचा राजस्थानचा आहे. रामचंद्रने शाळेतील एका 8 वी तील मुलीवर लैंगिक अत्याचार केले. मात्र या मुलीने न घाबरता याबाबत शाळेच्या मुख्याध्यापकांना घडलेल्या प्रकाराची माहिती दिली. दरम्यान, शाळा प्रशासनाने तातडीने चौकशी करून आरोपीविरुद्ध तक्रार दाखल केली.
पीडित मुलीच्या तक्रारीवरून आरोपीला पोलिसांनी अटक केली आहे. तसेच शाळा प्रशासनाने आरोपी शिक्षक रामचंद्र सोनी याला निलंबित केले आहे. तसेच याप्रकरणी पुढील तपास सुरू आहे.
