सध्याच्या घडीला मखाना हा आरोग्यदायी पर्याय म्हणून अनेकांकडून सेवन केला जात आहे. मखाना हा एक अतिशय आरोग्यदायी नाश्ता म्हणून ओळखला जातो. निरोगी आणि तंदुरुस्त राहायचे असेल, त्यांच्यासाठी हा सर्वोत्तम नाश्ता आहे. मखानामध्ये अनेक पोषक घटक असतात. त्यात फायबर आणि प्रथिने भरपूर असतात. वजन कमी करण्यासाठी हा एक सर्वोत्तम पर्याय आहे. यामध्ये अँटीऑक्सिडंट्स आणि इतर अनेक खनिजे देखील भरपूर असतात.
मखाना हे कमळाच्या रोपाचे बीज आहे. कमळ तलावांमध्ये वाढते. मखाना वाळवून भाजल्यावर ते कुरकुरीत होते. त्याला थोडी गोड चव असते. आकाराने लहान असले तरी ते पोषक तत्वांचा खजिना आहे. त्यात कॅल्शियम, लोह, प्रथिने, कार्बोहायड्रेट्स, मॅग्नेशियम, फॉस्फरस, पोटॅशियम आणि इतर खनिजे असतात.
वजन कमी करायचे असेल तर, मखाना हा एक उत्तम पर्याय आहे. यामध्ये कमी कॅलरीज असतात. तसेच यात फायबरचे प्रमाण जास्त असते. फायबरमुळे आपले पोट जास्त काळ भरल्यासारखे राहते. यामध्ये कॅल्शियम देखील असते. यामुळे हाडे मजबूत होण्यास मदत मिळते. मखाना रक्तातील साखर नियंत्रित करण्यास देखील मदत करते. म्हणून मधुमेहींसाठी देखील ते खाणे आरोग्यदायी आहे. फायबरच्या अधिक मात्रेमुळे मखाना हे पचनसंस्थेसाठी उत्तम मानले जाते.
मखाना हृदयाच्या आरोग्यासाठी देखील फायदेशीर आहे कारण त्यात चरबी आणि कोलेस्टेरॉल कमी असते. मखान्यात असलेले अमीनो आम्ल मानसिक आरोग्य आणि झोपेसाठी फायदेशीर असतात. त्यात असलेले अँटीऑक्सिडंट्स सुरकुत्या कमी करण्यास मदत करतात.
मखाना अनेक प्रकारे खाऊ शकता. खीर आणि हलवा बनवण्यासाठी देखील मखान्याचा वापर केला जातो. मखाना काही लोक भाज्यांमध्ये घालतात. तूप आणि मीठ घालून मखाना खाणे हे अधिक फायदेशीर आहे. मखान्याचे सुक्या मेव्यासोबत लाडू बनवणेही तितकाच पौष्टीक पर्याय आहे.
परंतु असे असले तरी, एकाच वेळी जास्त मखाना खाल्ल्याने बद्धकोष्ठता होऊ शकते. कमी रक्तदाब असलेल्या लोकांनी देखील मर्यादित प्रमाणात मखाना खायला हवा.
