माणगाव शहरातील मोर्बा मार्गावरील उपजिल्हा रुग्णालयासमोर झालेल्या भीषण अपघातात 3 जण जागीच ठार झाले आहेत. हा अपघात इतका भीषण होता की, टेम्पो ट्रव्हलरच्या वाहनचालकाने समोर उभ्या असलेल्या वाहनाला जोरदार धडक देत रस्त्याने जात असलेल्या पादचाऱ्यांना सुमारे 20 फूट फरफटत नेले. दरम्यान, बेदरकारपणे चालवणारा वाहनचालक फुटपाथवर गाडी चढवून तत्काळ फरार झाला.
म्हसळा येथून माणगांवकडे आज संध्याकाळी 4 वाजण्याच्या सुमारास टेम्पो ट्रव्हलर जात होती. मोर्बारोड जवळील रिक्षा बस स्थानक असलेल्या उप जिल्हा रुग्णालय समोरील पादचारी वामन पवार, दिनेश शेलार, दीपिका शेलार यांना जोरदार भीषण धडक दिली. या धडकेने वामन पवार व दीपिका शेलार रस्त्याच्या बाजूला उडाले. या अपघातात वामन पवार, दिनेश शेलार, दीपिका शेलार यांचा दुर्दैवी मृत्यू झाला आहे. अपघाताची माहिती कळताच माणगाव पोलीस तत्काळ घटनास्थळी दाखल झाले.या अपघाताचा तपास माणगाव पोलीस करीत आहेत.
