नगर महापालिकेच्या पाणी योजनेला होणार्‍या वीजपुरवठ्याच्या यंत्रणेची दुरुस्ती महावितरणद्वारे शनिवारी (4 जानेवारी) केली जाणार आहे. यासाठी 5 तास पाणी योजनेचा वीजपुरवठा बंद (शटडाऊन) ठेवला जाणार असल्याने शहराचा पाणीपुरवठा शनिवारपासून तीन दिवस विस्कळित होणार आहे. नगरला राहुरी तालुक्यातील मुळा धरणातून पाणीपुरवठा होतो. यासाठी मुळा धरण, विळद जलशुद्धीकरण केंद्र व नागापूर उपकेंद्र येथे वीज मोटारींद्वारे पाणीउपसा करून वसंत टेकडीच्या मुख्य टाकीत पाणी आणून ते शहरभर वितरित केले जाते. या योजनेला होत असलेल्या वीज पुरवठ्याच्या यंत्रणेची दुरुस्ती महावितरणद्वारे शनिवारी सकाळी 11 ते सायंकाळी 5 या वेळेत केली जाणार आहे. या काळात पाणी योजनेचा मुळा धरण परिसरातील वीजपुरवठा बंद (शटडाऊन) ठेवला जाणार आहे. त्यामुळे धरणातील पाणीउपसा पाच तास बंद राहणार आहे. त्यानंतरही वीजपुरवठा सुरू झाल्यावर पाणीपुरवठा पाइपलाइनमधील पाणी व हवेचा दाब नियंत्रित राहण्यासाठी टप्प्या टप्प्याने पाणीउपसा सुरू केला जाणार आहे. यामुळे पुरेसे पाणी शहराला उपलब्ध होण्यात अडचणी येणार असल्याने तीन दिवस पाणीपुरवठा विस्कळित राहणार आहे.
शनिवारी शटडाऊन घेतले जाणार असल्याने या दिवशी सकाळी 9 नंतर पाणीपुरवठा होणार असलेल्या बोल्हेगाव, नागापूर, सावेडीतील गुलमोहोर रस्ता, पाइपलाइन रस्ता, लक्ष्मीनगर, सूर्यनगर, निर्मलनगर, मुकुंदनगर तसेच स्टेशन रस्ता, सारसनगर, विनायकनगर, केडगाव, नगर-कल्याण रस्त्यावरील शिवाजीनगर परिसरास पाणी दिले जाणार नाही. तसेच रविवारी (5 जानेवारी) मध्य शहरातील मंगल गेट, झेंडी गेट, डाळमंडई, रामचंद्र खुंट, काळू बागवान गल्ली, धरती चौक, माळीवाडा, कोठी, जिल्हाधिकारी कार्यालय परिसर तसेच सावेडीतील गुलमोहोर रस्ता व प्रोफेसर कॉलनी परिसर, सिव्हिल हडको, प्रेमदान हडको, म्युनिसिपल हडको परिसरासही पाणीपुरवठा होणार नाही. या भागास सोमवारी (6 जानेवारी) पाणी दिले जाणार आहे. तर वेळापत्रकानुसार सोमवारी पाणी दिल्या जाणार्‍या सर्जेपुरा, तोफखाना, सिद्धार्थनगर, दिल्ली गेट, नालेगाव, चितळे रस्ता, कापड बाजार, माळीवाडा भागास मंगळवारी (7 जानेवारी) पाणीपुरवठा होणार असल्याचे महापालिकेने कळवले आहे. नागरिकांनी उपलब्ध पाणी जपून वापरण्याचे आवाहन करण्यात आले आहे.
