शिवडी येथे एका महिलेची हत्या करून पसार झालेल्या आरोपीला अखेर पोलिसांनी पकडले. काळोखाचा फायदा घेत आरोपी सटकला, पण त्याचे चिखलाने माखलेले कपडे पोलिसांच्या पथ्यावर पडले आणि आरोपीला शिवडी येथून अटक झाली.
बुधवारी रात्री आरोपी चंदन आणि हसिना यांच्यात बीडीडी चाळ क्रमांक 9 येथे वाद झाला. त्यावेळी हसिना ही दारूच्या नशेत तर्रर होती. तिने नशेतच चंदनच्या तोंडावर मारले. परिणामी चंदनच्या जिभेला दुखापत झाली. यामुळे संतापलेल्या चंदनने हसिनाला बेदम मारहाण केली. या मारहाणीत नशेत असलेल्या हसिनाचा मृत्यू झाला.
या प्रकरणी रफी अहमद किडवाई मार्ग पोलिसांनी हत्येचा गुन्हा दाखल करून आरोपींचा शोध सुरू केला, पण घटनास्थळी सीसीटीव्ही नसल्याने आरोपीची ओळख पटणे अशक्य होते. दरम्यान, रात्री 11.30 वाजण्याच्या सुमारास एक व्यक्ती शिवडी स्थानकात दिसला. तो जरा सैरावैरा झाला होता आणि त्याचे कपडे चिखलाने माखलेले होते, अशी माहिती पोलिसांना मिळाली. त्यानुसार पोलिसांनी त्याचा शोध घेऊन आरोपीला अटक केली.
