महिला आणि तरुणींना त्रास देण्यासाठी बनावट नावाने सोशल मीडियावर अकाउंट उघडून अश्लील आणि द्वेषपूर्ण पोस्ट करत ब्लॅकमेल करणाऱ्याला अखेर दहिसर पोलिसांनी शुभम कुमार सिंगला बेडय़ा ठोकल्या. त्याने 300 हून अधिक महिलांचे अकाउंट उघडल्याचे तपासात समोर आले आहे.
दहिसर येथे तरुणी राहते. जानेवारी महिन्यात तिने दहिसर पोलीस ठाण्यात तक्रार दाखल केली. अज्ञात व्यक्तीने तिच्या नावाने अश्लील इंस्टाग्राम अकाउंट उघडले आहे. त्या बनावट अकाउंटवरून अश्लील आणि द्वेषपूर्ण पोस्ट अपलोड करत होता. तसेच तरुणीला ब्लॅकमेल करत तो तिची बदनामी करत होता. घडल्याप्रकरणी दहिसर पोलिसांनी अज्ञात व्यक्तीविरोधात गुन्हा नोंद केला.
वरिष्ठ पोलीस निरीक्षक अशोक होनमाने यांच्या पथकातील पोलीस निरीक्षक देसाई, सहायक निरीक्षक अंकुश दांडगे, महिला उपनिरीक्षक श्रद्धा पाटील, कुदळे, देशपांडे, चिटणीस, चव्हाण, बिडगर, सोनल म्हस्के आदींच्या पथकाने तपास सुरू केला. पोलिसांनी फेसबुक आणि गुगल अकाउंटची माहिती काढली. त्या माहितीच्या आधारे पोलिसांचे पथक कर्नाटकच्या संदूर येथे गेले. तेथून पोलिसांनी शुभमला ताब्यात घेतले.
