विविध विकासकामांची हजारो कोटींची बिले सार्वजनिक बांधकाम विभागाने थकवल्याने कर्जबाजारी झालेल्या ठेकेदारांनी मंगळवारपासून सार्वजनिक बांधकाम भवनासमोर आंदोलन सुरू केले आहे. कर्जाचे हप्ते भरता येत नसल्याने त्यांनी आज आंदोलनस्थळी रोलर, डंपर, जेसीबीसह धडक देत वाहन विक्रीचे फलक झळकवले, शासनविरोधी घोषणाबाजी करीत अधिकाऱयांची वाहने अडविण्याचा प्रयत्न केला.
सार्वजनिक बांधकाम विभागाकडील विविध रस्ते, पूल, इमारती यांच्या दुरुस्तीची कामे गेल्या दोन ते तीन वर्षांत पूर्ण करूनही त्याची बिले प्रलंबित आहेत. वारंवार विनंती करूनही विभागाने दखल घेतली नाही. मुख्यमंत्र्यांकडे बैठक होऊनही हा प्रश्न मार्गी लागला नाही. ठेकेदारांनी बँकांकडून कर्ज घेऊन, सोने गहाण ठेवून, उसनवारीने असे पैसे उभे करून शासनाची कामे पूर्ण केली. निविदा सादर करताना स्वमालकीची यंत्रसामग्री असावी ही विभागाची अट असल्याने सर्वच ठेकेदारांनी कर्ज काढून यंत्रसामग्री विकत घेतली, त्यामुळे आर्थिक बोजा वाढला आहे. संबंधितांचा तगादा सुरू आहे, गहाण मालमत्ता लिलावाची प्रक्रिया सुरू झाल्याने तणावाखाली असलेल्या या शेकडो ठेकेदारांनी बिल्डर असोसिएशन ऑफ इंडिया, नाशिक शाखेच्या नेतृत्वाखाली मंगळवारपासून सार्वजनिक बांधकाम विभाग कार्यालयासमोर आंदोलन सुरू केले. आगामी सिंहस्थाची कामे स्थानिक ठेकेदारांना द्या, अशी मागणी केली आहे.
सामूहिक आत्मदहनाचा इशारा
थकीत बिलप्रश्नी आता तरी सरकारने गांभीर्याने लक्ष द्यावे. गुरुवारी दुपारी 2 वाजेपर्यंत समाधानकारक तोडगा काढण्यात यावा, अन्यथा सर्व ठेकेदार दुपारनंतर सामूहिक आत्मदहन करतील, असा इशारा निवेदनाद्वारे देण्यात आला आहे.
