वडाळा येथील एका इमारतीमधील 102 सदनिकाधारकांकडून सदनिका खरेदीच्या नावाखाली 100 कोटी रुपये घेऊन या रकमेचा स्काय 31 ही इमारत बांधण्यासाठी पूर्णपणे वापर न करता त्यापैकी काही रक्कम स्वतःच्या खात्यावर तसेच त्यांच्याशी संबंधित कंपन्यांच्या खात्यावर वळती करून अपहार केल्याचा प्रकार समोर आला आहे. याप्रकरणी गुन्हा दाखल करण्यात आला असून आर्थिक गुन्हे शाखा या प्रकरणाचा तपास करत आहेत.
कांदिवली येथे राहणारे चार्टर्ड अकाऊंटंट अनिल द्रोण (62) यांच्या तक्रारीवरून कोटय़वधी रुपयांचा अपहार केल्याप्रकरणी सुब्बरामन विलयनुर, उमा सुब्बरामन तसेच बी. पी. गंगर कन्स्ट्रक्शन प्रा. लि. व अन्य अज्ञात व्यक्तींविरोधात गुन्हा नोंदविण्यात आला आहे. या आरोपींनी आपापसात संगनमत करून वडाळा कात्रक मार्गावरील स्काय 31 या इमारतीतील 102 सदनिकाधारकांकडून 2018 पासून आजपर्यंत सदनिका खरेदीची अंदाजे 100 कोटी रुपये रक्कम घेतली. परंतु या घेतलेल्या रकमेचा स्काय 31 ही इमारत बांधण्यासाठी पूर्णपणे वापर न करता त्यापैकी काही रक्कम आपल्या फायद्यासाठी स्वतःच्या खात्यावर तसेच त्यांच्याशी संबंधित असलेल्या कंपन्यांच्या खात्यावर वळती करून रकमेचा अपहार केला.
एकाच सदनिकेची दोघांना विक्री
सदर इमारतीतील एकच सदनिकेची दोघांना विक्री करून दोघांकडूनही पैसे घेण्यात आले. अशा प्रकारे आर्थिक फसवणूक करण्यात आल्याने गुन्हा दाखल करण्यात आला आहे. आर्थिक गुन्हे शाखेचे कक्ष 11 याप्रकरणी तपास करत आहेत.
